İDMAN
Bakıda Beynəlxalq Olimpiya Günü qeyd edilib
![](/files/galleryphoto/2023/3/1200x630/w_1616983216991833432677_1200x630.jpg)
![](/files/galleryphoto/2023/3/1200x630/w_1616983216995790138963_1200x630.jpg)
![](/files/galleryphoto/2023/3/1200x630/w_1616983216994733523915_1200x630.jpg)
![](/files/galleryphoto/2023/3/1200x630/w_161698321699370831125_1200x630.jpg)
![](/files/galleryphoto/2023/3/1200x630/w_1616983216994744950856_1200x630.jpg)
![](/files/galleryphoto/2023/3/1200x630/w_1616983216995311164588_1200x630.jpg)
![](/files/galleryphoto/2023/3/1200x630/w_1616983216992274820970_1200x630.jpg)
![](/files/galleryphoto/2023/3/1200x630/w_1616983216995563115469_1200x630.jpg)
![](/files/galleryphoto/2023/3/1200x630/w_1616983217002417928151_1200x630.jpg)
![](/files/galleryphoto/2023/3/1200x630/w_1616983217005365561257_1200x630.jpg)
![](/files/galleryphoto/2023/3/1200x630/w_1616983217001982519771_1200x630.jpg)
![](/files/galleryphoto/2023/3/1200x630/w_161698321700819343685_1200x630.jpg)
![](/files/galleryphoto/2023/3/1200x630/w_161698321700218158500_1200x630.jpg)
![](/files/galleryphoto/2023/3/1200x630/w_161698321700217159895_1200x630.jpg)
Bakı, 26 oktyabr, AZƏRTAC
Oktyabrın 26-da Respublika Olimpiya Mərkəzində Milli Olimpiya Komitəsinin (MOK) təşkilatçılığı ilə Beynəlxalq Olimpiya Gününə həsr edilmiş tədbir keçirilib.
AZƏRTAC xəbər verir ki, tədbirdə Milli Olimpiya Komitəsinin vitse-prezidentləri Çingiz Hüseynzadə və Zemfira Meftaxetdinova, MOK-un baş katibi Azər Əliyev, elm və təhsil nazirinin müavini Firudin Qurbanov, olimpiyaçılar, gənc idmançılar, federasiya və media nümayəndələri iştirak ediblər.
Tədbirdə çıxış edən MOK-un vitse-prezidenti Çingiz Hüseynzadə bu ilin iyun ayının mühüm idman yarışları ilə zəngin olduğunu deyib: “Avropa Gənclər Olimpiya Festivalı, Avropa Oyunları və MDB Oyunları həmin ərəfədə keçirildi. Bu səbəbdən qrafik çox sıx oldu. Biz də Beynəlxalq Olimpiya Komitəsinin razılığı əsasında Olimpiya Günü tədbirini bu günə təyin etdik”.
Beynəlxalq Olimpiya Gününün 1996-cı ildən etibarən hər il qeyd olunduğunu diqqətə çatdıran Çingiz Hüseynzadə əlavə edib: “1997-ci ildə Prezident İlham Əliyev Azərbaycan Milli Olimpiya Komitəsinin prezidenti seçildikdən sonra ölkəmizdə idmanın yüksəliş dövrü başladı. İdmançılarımız Olimpiya Oyunlarında, dünya və Avropa çempionatlarında böyük qələbələr əldə etdilər. Bundan başqa ölkəmiz mühüm idman tədbirlərinə ev sahibliyi etməyə başladı. Biz beynəlxalq idman qurumlarının etimadını qazandıq. Bir daha qeyd edim ki, İlham Əliyev Milli Olimpiya Komitəsinin prezidenti seçildikdən sonra Azərbaycanda Beynəlxalq Olimpiya Günü yüksək səviyyədə qeyd olunmağa başladı.
Nazir müavini Firudin Qurbanov isə tədbirin məktəblilərin inkişafında böyük əhəmiyyətə malik olduğunu diqqətə çatdırıb. O, çıxışında bir sıra maraqlı məqamlara da toxunub: “Çox xoşdur ki, biz bu gün böyük bir Qələbə qazanan qalib bir ölkənin vətəndaşları kimi bu tədbirdə iştirak edirik. Otuz ilə yaxın bizim torpaqlarımız işğal altında olub. Lakin bu gün müstəqil Azərbaycanın Üçrəngli Bayrağı Qarabağın hər bir guşəsində qürurla dalğalanır. Bu bayraqları ölkə Prezidenti, Ali Baş Komandan İlham Əliyev qaldırıb. Sevinirəm ki, bu tədbirdə ölkəmizin idman şərəfini beynəlxalq arenalarda şərəflə qoruyan Olimpiya çempionları və dünya, Avropa çempionatlarının mükafatçıları iştirak edirlər. Azərbaycan ilk dəfə Olimpiya Oyunlarında iştirak edəndə cəmi bir qızıl medalımız var idi. Lakin illər keçdikcə bu say artmağa başladı. Olimpiya Oyunlarında idmançılarımızın parlaq çıxışları ölkəmizdə böyük təntənə ilə qeyd olunurdu. Doğurdan da idman ölkəni bütün dünyada tanıtdıran vasitələrdən biridir. Mən bu gün hər bir iştirakçıya uğurlar və sağlam həyat tərzi arzulayıram. Elm və Təhsil Nazirliyi olaraq, bu kimi tədbirlərdə iştirak etməkdən çox məmnunuq”.
Rəsmi çıxışlardan sonra Olimpiya Mədəniyyəti və Təhsil Proqramı (OCEP) məktəblilərinin iştirakı ilə əyləncəli idman yarışı təşkil olunub. İki hissədən ibarət olan yarışlarda əvvəlcə paytaxtın 10 məktəbindən 200-dən artıq şagird və fiziki tərbiyə müəlliminin iştirakı ilə atletika idman növü üzrə mübarizəyə start verilib. Yarışların ikinci hissəsində isə dünya, Avropa çempionatlarının və AYOF-un qalib və mükafatçıları olan gənc cüdoçular məktəblilərlə birlikdə kəndirdartma və “Şən startlar” yarışında iştirak ediblər. Yarışın yekun nəticələrinə əsasən, Yasamal rayonunu təmsil edən 18 saylı məktəbin komandası 30 xalla birinci yerə layiq görülüb. Nəsimi rayonu 42 saylı məktəbin komandası 28 xalla ikinci, Nərimanov rayonu 193 saylı məktəbin kollektivi isə 27 xalla üçüncü yerə sahib çıxıb. Yarışın qalibləri kubok, diplom, medal və hədiyyələrlə mükafatlandırılıblar.
Tədbirin sonunda xatirə şəkili çəkdirilib.
Qeyd edək ki, Beynəlxalq və Avropa Olimpiya komitələrinin təşkil etdiyi layihələrdə fəal şəkildə iştirak edən Azərbaycan Milli Olimpiya Komitəsi 1996-cı ildən bu tədbiri həyata keçirir. Tədbirin əsas məqsədi Olimpiya Hərəkatına dəstək, gənc nəsil arasında olimpizmin təbliği, olimpiyaçıları tanıtmaq və Olimpiya dəyərlərini təşviq etməkdən ibarətdir.