Bakıda Birinci Autizm Maarifləndirmə Forumu keçirilib
Bakı, 30 aprel, AZƏRTAC
İDDO Psixi Sağlamlıq Proqramı və Tibbi Ərazi Bölmələrini İdarəetmə Birliyinin (TƏBİB) əməkdaşlığı çərçivəsində Yeni Klinikada I Autizm Maarifləndirmə Forumu keçirilib.
AZƏRTAC xəbər verir ki, forumda çıxış edən Milli Məclisin deputatı Nigar Məmmədova xüsusi qayğıya ehtiyacı olan fərdlərin cəmiyyətə inteqrasiyası və sosiallaşmasının əsas şərt olduğunu və bu sahədə fəaliyyət göstərən mütəxəssislərin maariflənməsi üçün bir araya gəlməyin vacibliyini vurğulayıb.
Milli Məclisin deputatı Jalə Əliyeva çıxışında qeyd edib ki, belə forumların ardıcıl olması vacibdir. Əsas məqsəd autizm haqqında maarifləndirmə işinin aparılması olmalıdır ki, onların sosiallaşmasında ümumi cəmiyyət olaraq birgə fəaliyyət göstərə bilək.
TƏBİB-in Təlim və tədqiqatlar departamentinin rəhbəri Teymur Mirzəbəyli isə forumda yalnız bir mövzunun deyil, anlayış və insanlıq dəyərlərinin müzakirə edildiyini bildirib. O qeyd edib ki, autizm tibbi diaqnoz olsa da, həm də çağırışdır: “Bunu görmək üçün yalnız gözlərimizə deyil, ürəyimizə də ehtiyacımız var. Autizmli fərdlər dünyanı bizim kimi görməyə bilər, amma bu, o demək deyil ki, onların dünyası daha az dəyərlidir”.
İDDO Psixi Sağlamlıq Proqramının baş psixoloqu Rövşən Nəzərli çıxışında hazırda bu uşaqlarla işləyərkən pedaqoji yanaşmaya üstünlük verildiyini bildirib: “TƏBİB və İDDO Psixi Sağlamlıq Proqramının işbirliyi nəticəsində qurulacaq olan yeni inkişaf sistemi pedaqoji yanaşmadan psixoloji yanaşmaya keçidi təmin edəcək. Belə ki, uşaqların 6 ayından psixoloji diaqnostikasının aparılmasına nail olmaq üçün həkimlərlə psixoloqlar birlikdə əməkdaşlıq edərək ilkin diaqnostikanı həyata keçirə biləcəklər. Cəmiyyət olaraq maariflənsək və bir yerdə mübarizə aparmağı bacarsaq, ilkin yaş dövründə problemin aşkarlanmasına nail ola bilərik. Doğru yanaşma onları bizdən ayrı deyil, məhz eyni cəmiyyətin üzvü kimi formalaşdıra və bizdən biri olaraq inkişaf etdirə bilər. Bu yolda valideynlərin əməyi bəzən görünməz olur, amma təsiri sonsuzdur. Onlar hər gün səssiz bir mübarizə aparırlar. Biz də cəmiyyət olaraq bu valideynlərə dəstək olmalıyıq”.
Tədbir zamanı vurğulanıb ki, mərkəzlərdə tətbiq olunan proqramların əsas elmi yanaşması pedaqoji inkişafyönümlüdür. Bu hal isə uşaqlarda ilkin diaqnostikanın aparılmasında çətinlik yaradır. Yəni, psixoloji yanaşmada 6-9 ayında ilkin diaqnostika aparmaq imkanı var ikən, pedaqoji yanaşmada bu 2-3 yaşda nəzərdə tutulur. Yeni yanaşma problemin erkən aşkar olunması və aradan qaldırılması üçün müəyyən tədbirlərin görülməsinə imkan verəcək.
R.Nəzərli onu da qeyd edib ki, yeni qurulan sistem cari sistemin fəaliyyətinə mənfi təsir etməyəcək: “Çünki yeni sistemdə pedaqoji yanaşma deyil, psixoloji yanaşma tətbiq olunacaq. Bu isə o deməkdir ki, fəaliyyət göstərən mərkəzlərin işinə müdaxilə olunmadan yeni psixoloji yardım mərkəzləri yaradılacaq. Yeni yaranan mərkəzlər isə peşəkar psixoloji diaqnostika ilə fərqlənəcək”.
Forumun təşkilində məqsəd cəmiyyətin maariflənməsi, autizmin diaqnostikası və reabilitasiyasında tətbiq edilən son yeniliklər və elmi tədqiqatların təqdim edilməsi olub. Forumda tədris müəssisələrinin psixoloqları, tibb müəssisələrinin psixoloqları, universitetlərin müəllim və tələbələri iştirak ediblər.
Bölmənin digər xəbərləri
