Bakı, 7 mart (AZƏRTAC). Martın 7-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.

“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdı. Burada sakinlərə Sabirabad, Zərdab, Gədəbəy və digər rayonlardan gətirilmiş 15 tondan çox məhsul, o cümlədən 2 ton ət, 0,3 ton ağartı, 5 ton tərəvəz, 3,5 ton meyvə, 4 ton kartof, 4 min ədəd yumurta, 70 kiloqram bal təklif olunurdu. Gədəbəyli fermer Arzu Tanrıquliyev yarmarkaya gətirdiyi 5 ton kartof, soğan, yerkökü və çuğunduru münasib qiymətə satırdı. Fermer hər həftə yarmarkaya məhsul gətirəcəyini bildirdi. Alıcı Sakitə Cavadovanın sözlərinə görə, yaxın ərazidə yaşadığından hər həftə buradan bazarlıq edir. Məhsulların qiyməti münasib, keyfiyyəti isə yüksəkdir.

A.Şərifzadə küçəsində, metronun “İnşaatçılar” stansiyasının yaxınlığındakı yarmarkada Novruz ab-havası duyulurdu. Bu, yarmarkaya gətirilmiş kənd təsərrüfatı məhsullarının çeşidinin çoxluğundan, xüsusilə də bayram çərəzlərinin bolluğundan hiss olunurdu. Yarmarkada Quba, Qusar, Salyan, Dəvəçi, Astara, İmişli və digər rayonların fermerlərinin gətirdiyi məhsullar çoxluq təşkil edirdi. Kənd Təsərrüfatı Nazirliyinin nümayəndəsi Vahid Zərgərovun verdiyi məlumata görə, fermerlər və şəxsi təsərrüfat sahibləri satışa 78,6 ton məhsul çıxarmışlar. Bütün məhsulların keyfiyyəti ciddi surətdə yoxlanılır, ət məhsulları baytar müayinəsindən keçirilir.

Həmişə olduğu kimi, bu gün də Salyan rayonunun Qızılağac kəndindən - Söhrab Böyükağa oğlunun “Qırxçıraq” fermer təsərrüfatından gətirilmiş mal və qoyun ətlərini almaq üçün növbə yaranmışdı. Burada ət bazar qiymətlərindən xeyli aşağı - mal əti 4 manat 50 qəpiyə, qoyun əti 5 manat 60 qəpiyə satılırdı.

Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Masallı, Quba və digər rayonlardan 16 tondan çox kənd təsərrüfatı məhsulları, Giləzi, Hacıqabul quşçuluq fabriklərindən 11 min 200 ədəd yumurta gətirilmişdir.

Novruz bayramı ərəfəsində yarmarkaya gələnlərin sayı xeyli artmışdır. Qəbələdən qoz və fındıq gətirmiş Kənan Həsənov artıq 150 kiloqramdan çox məhsul satdığını bildirmışdır. Fermer qozun kiloqramını 2 manata, fındığı isə 1 manat 80 qəpiyə təklif edirdi.

Kənd Təsərrüfatı Nazirliyinin nümayəndələri qiymətə və keyfiyyətə nəzarət edirdilər. Yarmarkada təklif olunan məhsulların qiyməti bazardakından 25-30 faiz ucuz idi.

Qəsəbə sakinləri yarmarkaların davamlı təşkilinə görə minnətdarlıqlarını bildirirdilər.

Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş 266,3 ton meyvə, tərəvəz və digər kənd təsərrüfatı məhsulları şəhər əhalisi tərəfindən həvəslə alınırdı. Kənd Təsərrüfatı Nazirliyinin nümayəndəsi Namiq Qüdrətov bildirdi ki, yarmarkaya çıxarılan məhsulların çeşidi artırılmışdır. Satılan məhsulların qiyməti bazardakından 20-25 faizə qədər ucuzdur. Satışda fındıq, şabalıd, qoz və müxtəlif meyvə qurusu üstünlük təşkil edir. Burada qozun və fındığın kiloqramı 1 manat 80 qəpiyə, mal əti 4 manata, qoyun əti isə 4 manat 50 qəpiyə təklif olunurdu. Yarmarkada alış-veriş üçün hər cür şərait yaradılmışdı, məhsulların keyfiyyətinə nəzarət edilirdi.

Suraxanıda “Günəş” ticarət mərkəzindəki yarmarkada şəhər sakinlərinə Samux, Daşkəsən, Quba, Biləsuvar və digər rayonlardan gətirilmiş 55 ton  550 kiloqram məhsul təklif olunurdu. Havaların xoş keçməsi və bayram ovqatı şəhər sakinlərinin yarmarkaya axınını gücləndirmişdir. Burada fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmalarına imkan yaradılmışdır. Yarmarkaya gətirilən məhsullar arasında kartof, soğan, yerkökü, kələm, balqabaq, ət, süd məhsulları, göyərti, alma, qoz, fındıq, habelə istixanalarda yetişdirilmiş pomidor və xiyar, eləcə də Novruz bayramında istifadə olunan digər məhsullar çoxluq təşkil edirdi. Burada yumurtanın biri 7-10 qəpiyə, almanın kiloqramı 30-70 qəpiyə, qoz ləpəsi 3-6 manat, şabalıd 1 manat 50 qəpik-4 manata, xurma 30-80 qəpiyə, qoyun əti 5 manat-5 manat 50 qəpiyə, mal əti 4 manat 60 qəpiyə, quş əti 3 manat-3 manat 80 qəpiyə satılırdı.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada Cəlilabad rayonunun fermerləri sakinlərə 9 ton 300 kiloqram məhsul təklif edirdilər. Burada sakinlərə bazar qiymətlərindən xeyli ucuz ət, ağartı, kartof, soğan, sitrus meyvələri, alma, nar, heyva, toyuq əti, yumurta, kələm, balqabaq, göyərti və s. təklif edirdilər.

Yarmarkaya 64 tondan çox məhsulun çıxarıldığını bildirən Kənd Təsərrüfatı Nazirliyinin nümayəndəsi Mustafa Rüstəmov, bütün məhsulların keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır.

Alıcılar burada yaradılan şəraitdən, məhsulun bolluğundan və qiymətlərin münasibliyindən razılıq edirdilər.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada kələmin kiloqramı 40 qəpiyə, kartof 30, alma isə 25 qəpiyə təklif olunurdu. Sakinlər qiymətləri bazardakından 30-35 faiz ucuz olan məhsulları həvəslə alırdılar. Ağsu Rayon İcra Hakimiyyəti başçısının müavini Elxan Abdullayev bildirmişdir ki, bu gün rayonun fermerləri satışa 2,5 ton kartof, 1,2 ton soğan, 2,2 ton alma, digər meyvə-tərəvəz və bostan məhsulları çıxarmışlar.

Kənd Təsərrüfatı Nazirliyinin nümayəndəsi Qalib Hacızadənin dediyinə görə, Ağsu və Qazax rayonlarından yarmarkaya satışa 18,7 ton məhsul gətirilmişdir.

Binəqədi rayonunda 6 nömrəli Bakı Texniki Peşə Liseyinin qarşısındakı yarmarkaya Bərdə, Goranboy və Ağstafadan gətirilmiş meyvə-tərəvəz, süd və bostan məhsulları satılırdı.

Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada fermerlər həmişəkindən daha çox - 54,1 ton məhsul çıxarmışdılar. Onların arasında kartof, soğan, kələm, ət, süd məhsulları, göyərti, alma, habelə istixana şəraitində yetişdirilmiş pomidor, xiyar və s. çoxluq təşkil edirdi.

Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət etmişlər.

######