BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 16 mart (AZƏRTAC). Martın 15-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada satışa Sabirabad, Zərdab, Gədəbəy, Hacıqabul və digər rayonlardan gətirilmiş müxtəlif çeşidli kənd təsərrüfatı məhsulu çıxarılmışdı.
Gədəbəyin Çalburun kəndindən fermer Arzu Tanrıquliyev satışa 5 ton kartof, 300 kiloqram pendir, süd məhsulları, bal, alma və armud çıxarmışdı. O, iki ildir ki, bu yarmarkada məhsul satdığını və yaradılmış şəraitdən razılığını söylədi. Alıcılardan Adil Əliyev, Sevinc Qarayeva müxtəlif çeşidli kənd təsərrüfatı məhsullarını böyük həvəslə alır və bu işi təşkil edənlərə minnətdarlıqlarını bildirirdilər.
Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, ümumilikdə şənbə və bazar günü yarmarkada 24 tondan çox məhsul satılmışdır. Burada satılan məhsulların qiyməti bazardakından 20-25 faiz ucuzdur. Yarmarkada sərbəst alış-veriş etmək üçün hər cür şərait yaradılmışdır.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkada xalqımızın ən əziz bayramı olan Novruzun yaxınlaşmasının əlamətləri aydın hiss olunurdu. Yarmarkadakı məhsullar arasında bayram çərəzlərinin çoxluq təşkil etməsi, eyni zamanda, bu məhsulların qiymətinin münasibliyi alıcıların seçim imkanlarını xeyli artırırdı. Salyan, Dəvəçi, Qusar, Astara, Quba və digər rayonların fermerləri bir gün əvvəl yarmarkaya gətirdikləri 82,7 ton müxtəlif çeşidli məhsulun yarıdan çoxunu artıq satmışdılar. Yarmarkada soğan-kartofun kiloqramı 40-50 qəpiyə, kələm 30-40 qəpiyə, alma 30-50 qəpiyə, istixanada yetişdirilən xiyar 80 qəpik-1 manata, pomidor 1 manat 30-1 manat 50 qəpiyə, diri balıq 4-5 manata, göyərtinin bir neçə dəstəsi 10-20 qəpiyə təklif olunurdu. Salyandan gətirilmiş mal ətinin kiloqramı 4 manat 50 qəpiyə, qoyun əti 5 manat 60 qəpiyə satılırdı.
Burada məhsulun keyfiyyətinə, sanitar-gigiyenik tələblərə əməl olunmasına ciddi nəzarət vardı. Meydanın ortasında qoyulmuş nəzarət tərəzisi vasitəsilə hər bir alıcı aldığı məhsulun çəkisini yoxlaya bilərdi.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada sakinlər satışa çıxarılan məhsulların bolluğundan razılıq edirdilər. Novruz bayramı münasibətilə yarmarkaya gətirilən kənd təsərrüfatı məhsullarının çeşidi xeyli artmışdı. Burada bayram süfrəsi üçün zəruri olan qoz, fındıq daha çox alınırdı. İşçi qrupunun qərargahından verilən məlumata görə, şənbə və bazar günləri burada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş 128 ton meyvə, 75,7 ton tərəvəz, 46,6 ton kartof və digər məhsullar satılmışdır.
Bazar günü Suraxanıda “Günəş” ticarət mərkəzindəki yarmarkada Samux, Daşkəsən, Quba, Biləsuvar rayonlarının fermerləri 50 tondan çox, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri 10 tona yaxın məhsul satmışlar. Hər iki yarmarkaya gətirilən məhsullar arasında kartof, soğan, yerkökü, kələm, balqabaq, ət, ağartı, meyvə-tərəvəz çoxluq təşkil etmişdir. Sakinlər yumurtanın birini 7-10 qəpiyə, almanın kiloqramını 30-70 qəpiyə, qoz ləpəsini 3-6 manata, şabalıdı 1 manat 50 qəpik-4 manata, xurmanı 30-80 qəpiyə, qoyun ətini 5 manat-5 manat 50 qəpiyə, mal ətini 4 manat 60 qəpiyə, quş ətini 3 manat-3 manat 80 qəpiyə almışlar. Kənd Təsərrüfatı Nazirliyinin nümayəndəsi Mustafa Rüstəmov bildirmişdir ki, Novruz bayramı ərəfəsində sakinlərin yarmarkaya axını artmışdır. Fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmaları üçün hər cür imkan yaradılmışdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada əhaliyə ucuz qiymətlərə meyvə-tərəvəz, bostan və süd məhsulları təklif edilirdi. Qazax və Ağsu rayonlarından gətirilmiş həmin məhsullar alıcılar tərəfindən həvəslə alınırdı.
Kənd Təsərrüfatı Nazirliyinin nümayəndəsi Qalib Hacızadə bildirmişdir ki, şənbə və bazar günlərində yarmarkada 19 tonadək meyvə-tərəvəz satılmışdır.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Bərdə, Goranboy və Ağstafa fermerləri satışa bazardakından ucuz qiymətə kənd təsərrüfatı məhsulları çıxarmışdılar. Alıcılar qiymətlərin onlar üçün münasib olduğunu söyləyirdilər.
Kənd Təsərrüfatı Nazirliyinin nümayəndəsi Savalan Seyfəddinovun verdiyi məlumata görə, Nərimanov rayonunun Ə.Əliyev küçəsindəki yarmarkada iki gündə 36,8 ton məhsul çıxarılmışdır.
Astara Rayon İcra Hakimiyyətinin nümayəndəsi Səfər Abdullayev Novruzun gəlişi ilə əlaqədar fermerlərin subtropik meyvələr və tələbata uyğun olaraq tərəvəz məhsulları gətirdiklərini bildirmişdir.
Məhsulların qiymətində xeyli endirim müşahidə olunurdu.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət etmişlər.
######
Bölmənin digər xəbərləri
