BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 21 mart (AZƏRTAC). Martın 21-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir
Şənbə günü paytaxtın 7 rayonunda satışa yüz tonlarla məhsul çıxarılmışdı. Alıcıların azlığı diqqəti cəlb edirdi. Satıcılar bunu şəhər sakinlərinin bayram ərəfəsində kifayət qədər bazarlıq etməsi ilə əlaqələniridilər.
Novruz bayramı ilə əlaqədar isə yarmarkalarda daha çox qoz-fındıq, ərik, gavalı, alça qurusu, kişmiş, innab və ənənəvi məhsullar satılırdı. Məhsulların qiyməti malın keyfiyyətindən asılı olaraq fərqli idi. Məsələn, istixanada yetişdirilən pomidor və xiyarın kiloqramı 1 manat-1 manat 50 qəpiyə, kartof- soğan 30-50 qəpiyə, alma 40-60 qəpiyə, nar 80 qəpik-1 manata, portağal 1 manat 50- 1 manat 80 qəpiyə, xurma 40-70 qəpiyə, mal əti 5 manat 60 qəpiyə, qoyun əti manat- 5 manat 50 qəpiyə, quş əti 3 manat-3 manat 80 qəpiyə, yumurtanın ədədi 7-10 qəpiyə təklif edilirdi.
Yarmarka təşkilatçılarının fikrincə, buradakı qiymətlər bazarlardakından 20-25 faiz aşağıdır.
Yarmarkalara Sabirabad, Gədəbəy, Zərdab, Hacıqabul və Göyçay rayonlarından daha çox məhsul gətirilmişdi.
Bölmənin digər xəbərləri
