BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 4 aprel (AZƏRTAC). Aprelin 4-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada Sabirabad, Zərdab, Gədəbəy və Hacıqabul rayonlarından 12,66 ton məhsul, o cümlədən 2,5 ton ət, 0,4 ton ağartı, 3 ton tərəvəz, 4 ton kartof, 0,2 ton bostan bitkisi, 2,5 ton meyvə, 4 min yumurta, 60 kiloqram bal gətirilmişdi.
Sabirabaddan 1 tondan çox kartof və soğan gətirmiş Şöhrət Mehbalıyev bu məhsulların kiloqramını 30-40 qəpiyə təklif edirdi. O, son bir neçə həftədə burada 5 tona yaxın məhsul satdığını bildirdi.
Yarmarkada mal ətinin kiloqramı 4 manata, qoyun əti 4 manat 50 qəpiyə, quş əti 3 manat-3 manat 30 qəpiyə, kök və çuğundur 50-60, kələm 40-50 qəpiyə təklif olunurdu.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkada Quba, Qusar, Salyan, Dəvəçi, Astara, İmişli və digər rayonların fermerlərinin gətirdiyi məhsullar çoxluq təşkil edirdi. Kənd Təsərrüfatı Nazirliyinin nümayəndəsi Vahid Zərgərov bildirdi ki, fermerlər və şəxsi təsərrüfat sahibləri satışa 79,3 ton məhsul çıxarmışlar. Bütün məhsulların keyfiyyəti ciddi surətdə yoxlanılır, ət məhsulları baytar müayinəsindən keçirilir.
Həmişə olduğu kimi, bu gün də Salyan rayonunun Qızılağac kəndindən - Söhrab Böyükağa oğlunun “Qırxçıraq” fermer təsərrüfatından gətirilmiş mal və qoyun ətlərini almaq üçün növbə yaranmışdı. Burada ət bazar qiymətlərindən xeyli aşağı - mal əti 4 manat 50 qəpiyə, qoyun əti 5 manat 60 qəpiyə satılırdı.
Yarmarkadan əlidolu çıxan alıcılar burada yaradılan şəraitdən, məhsulun bolluğundan və qiymətlərin münasibliyindən razılıq edirdilər.
Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Masallı, Quba və digər rayonlardan 8 tondan çox kənd təsərrüfatı məhsulları, Giləzi, Hacıqabul quşçuluq fabriklərindən 16 min 200 yumurta gətirilmişdir. Biri 5 qəpiyə təklif edilən yumurtaları sakinlər həvəslə alırdılar.
Saatlıdakı “Bahar” kooperativinin nümayəndəsi Vaqif İsayev ölkəmizdə sahibkarlığın inkişafına göstərilən qayğıdan razılıqla danışaraq dedi ki, bu yarmarkalar alıcılar üçün sərfəli olmaqla yanaşı, fermerlərin öz məhsullarını bazarlara birbaşa və maneəsiz çıxarmasına şərait yaradır.
Yarmarkaya gətirilən hər bir məhsul ciddi sanitar-gigiyenik nəzarətdən keçirilirdi.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş kənd təsərrüfatı məhsullarının çeşidinin çoxluğu diqqəti cəlb edirdi.
Kənd Təsərrüfatı Nazirliyinin nümayəndəsi Namiq Qüdrətov bildirdi ki, bu gün alıcılara 223 tondan çox məhsul təklif olunur. Satışda meyvə-tərəvəz, ət-süd məmulatları, konservləşdirilmiş məhsullar vardır. Burada mal ətinin kiloqramı 4 manata, qoyun əti 4 manat 50 qəpiyə, toyuq əti 3 manata, yumurtanın biri 5 qəpiyə satılırdı.
Suraxanıda “Günəş” ticarət mərkəzindəki yarmarkada şəhər sakinlərinə Samux, Daşkəsən, Quba, Biləsuvar və digər rayonlardan gətirilmiş 49 ton 650 kiloqram məhsul təklif olunurdu. Havaların xoş keçməsi şəhər sakinlərinin yarmarkaya axınını gücləndirmişdi. Burada fermerlərə və şəxsi təsərrüfat sahiblərinə satışa daha çox və müxtəlif çeşidli məhsul çıxarmalarına bütün imkanlar yaradılmışdır. Yarmarkaya gətirilən məhsullar arasında kartof, soğan, yerkökü, kələm, xiyar, balqabaq, ət, süd məhsulları, göyərti, alma, qoz, fındıq, habelə istixanalarda yetişdirilmiş pomidor və digər məhsullar çoxluq təşkil edirdi.
Burada almanın kiloqramı 20-50 qəpiyə, qoz ləpəsi 2 manat 50 qəpik-4 manata, şabalıd 1 manat 50 qəpik-3 manata, qoyun əti 5 manat-5 manat 50 qəpiyə, quzu əti 6 manata, mal əti 4 manata, quş əti 3 manat-3 manat 50 qəpiyə satılırdı.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada Cəlilabad rayonunun fermerləri sakinlərə 7 ton məhsul təklif edirdilər. Burada sakinlərə bazar qiymətlərindən xeyli ucuz ət, ağartı, kartof, soğan, alma, nar, heyva, toyuq əti, yumurta, kələm, balqabaq, göyərti və s. təklif edirdilər.
Yarmarkaya 56 ton 650 kiloqram məhsulun çıxarıldığını bildirən Kənd Təsərrüfatı Nazirliyinin nümayəndəsi Mustafa Rüstəmov, bütün məhsulların keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır.
Yarmarkadan əlidolu çıxan sakinlər həm qiymətlərin münasibliyindən, həm də məhsulun bolluğundan razılıq edirdilər.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada alıcılar meyvə-tərəvəzin, bostan məhsullarının qiymətlərinin onlar üçün sərfəli olduğunu söyləyirdilər.
Ağsu Rayon İcra Hakimiyyəti başçısının müavini Elxan Abdullayev bildirdi ki, fermerlər bu gün alıcılara 2,4 ton kartof, 1,3 ton soğan, 4 tondan çox alma, kök, çuğundur və digər məhsullar təklif edirlər. Bir neçə saat ərzində məhsullarun xeyli hissəsi artıq satılmışdır.
Kənd Təsərrüfatı Nazirliyinin nümayəndəsi Qalib Hacızadənin verdiyi məlumata görə, Ağsu və Qazax rayonlarından yarmarkaya satışa 19,6 ton məhsul gətirilmişdir.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada da bolluq diqqəti cəlb edirdi. Ağstafa, Bərdə və Goranboydan gətirilmiş kənd təsərrüfatı məhsulları ucuz qiymətlərə təklif olunurdu.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, şənbə günü Nərimanov rayonunun Ə.Əliyev küçəsindəki yarmarkada fermerlər 41,7 ton məhsul çıxarmışdılar.
Yarmarkada kartof 30-50 qəpiyə, pomidor 1manat 50 qəpiyə, xiyar 1 manata, soğan 40 qəpiyə, çuğundur 60 qəpiyə, kök 50 qəpiyə, alma 30 qəpiyə, mal əti 4 manat 50 qəpiyə, qoyun əti 5 manata, yumurtanın biri 5-6 qəpiyə, göyərtinin dəstəsi 10 qəpiyə təklif olunurdu.
Məhsulların qiymətində Baharın gəlişi ilə xeyli endirim müşahidə olunurdu.
Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######
Bölmənin digər xəbərləri
