Bakıda sahibsiz heyvanlar peyvəndlənir, birkalanır – AKSİYA
Bakı, 21 oktyabr, AZƏRTAC
Oktyabrın 21-də Kənd Təsərrüfatı Nazirliyinin Baytarlıq Elmi-Tədqiqat İnstitutunda sahibsiz heyvanların qısırlaşdırılması, quduzluğa qarşı peyvənd edilməsi və birkalanması ilə bağlı aksiya keçirilib.
AZƏRTAC xəbər verir ki, tədbirdə çıxış edən Kənd Təsərrüfatı Nazirliyinin Baytarlıq Elmi-Tədqiqat İnstitutunun direktoru Siyalə Rüstəmova aksiyada institutun əməkdaşları ilə yanaşı, Almaniya, Avstriya və Rusiyadan 15 veterinar həkim cərrahın iştirak etdiyini bildirib. Onun sözlərinə görə, IDEA Heyvanlara Qayğı Mərkəzinin dəstəyi ilə keçirilən xeyriyyə aksiyasında Azərbaycan Dövlət Aqrar Universitetinin baytarlıq fakültəsinin tələbələri praktik təlimlər keçirlər.
İnstitut direktoru qeyd edib ki, ölkəmizdə sahibsiz heyvanlarla bağlı məsələ ən aktual problemlərdən hesab edilir. Son illər bu istiqamətdə mühüm addımlar atılıb, o cümlədən Azərbaycan “Ev heyvanlarının mühafizəsi haqqında” Avropa Konvensiyasına qoşulub, müxtəlif mərkəz və sığınacaqlar yaradılıb. Heyvanların mühafizəsi sahəsində uğurlu layihələrdən biri də Heydər Əliyev Fondunun vitse-prezidenti Leyla Əliyeva tərəfindən yaradılan IDEA Heyvanlara Qayğı Mərkəzi olub. Mərkəzin missiyası heyvanların rifah və sağlamlığının yaxşılaşdırılması, Bakı və onun ətraflarında sahibsiz heyvanların sayının tənzimlənməsi (sterilizasiyası), zoonoz və parazitik infeksiyaların yayılmasının qarşısının alınması (peyvəndlənmə), eləcə də heyvanlara humanist və məsuliyyətli yanaşmanın təşviq edilməsindən ibarətdir.
Kənd Təsərrüfatı Nazirliyinin aparat rəhbəri Azad Cəfərli 2022-ci ildən Kənd Təsərrüfatı Nazirliyinin Baytarlıq Elmi-Tədqiqat İnstitutunun nəzdində Baytarlıq Klinikasının fəaliyyət göstərdiyini diqqətə çatdırıb. Cari ilin yanvar ayından IDEA Heyvanlara Qayğı Mərkəzi ilə birgə klinikada sahibsiz heyvanlara ödənişsiz sterilizasiya aksiyası davam etdirilir. Lakin bu yalnız Bakı şəhərini əhatə edir, ətraf rayonlarda isə sahibsiz heyvanların sayının artması davam etməkdədir.
A.Cəfərli, həmçinin vurğulayıb ki, Kənd Təsərrüfatı Nazirliyinin Baytarlıq Elmi-Tədqiqat İnstitutu beynəlxalq əməkdaşlıq çərçivəsində bağlanmış müqaviləyə əsasən Almaniyanın “Tierschutz Entwicklungshilife e.v” təşkilatı ilə Azərbaycanda sahibsiz heyvanların qısırlaşdırılması, quduzluq peyvəndinin və qulaq birkalarının vurulması aksiyasının keçirilməsini planlaşdırır. Aksiyanın maliyyə xərcləri Bricit Bardo Fondu (Fondation Brigitte Bardot Animal Welfare Foundation) tərəfindən tam ödənilir.
Eyni zamanda, “Tierschutz Entwicklungshilife e.v” Beynəlxalq Fondu ilə birgə həyata keçirilən heyvanların sterilizasiyası üzrə xeyriyyə aksiyasına ölkəmizdə fəaliyyət göstərən baytar həkimlərinin və Azərbaycan Dövlət Aqrar Universitetinin Baytarlıq fakültəsində təhsil alan tələbələrimizin qoşulmasını təşkil edərək, əyani praktik təlimlərin verilməsi nəzərdə tutulub.
Ümumilikdə isə aksiya çərçivəsində ölkə üzrə (1000-1500) sahibsiz itlərin qısırlaşdırılması, qulaq birkalarının taxılması və quduzluq peyvəndinin vurulması və pişiklərin qısırlaşdırılması planlaşdırılıb.
Bölmənin digər xəbərləri
