Bakıda sərbəst güləş üzrə dünya Kuboku yarışları başlamışdır
Bakı, 12 may (AZƏRTAC). Mayın 12-də Bakıdakı “Sərhədçi” Olimpiya İdman Kompleksində sərbəst güləş üzrə dünya Kuboku yarışları başlamışdır.
AZƏRTAC xəbər verir ki, iki gün davam edəcək yarışda idmançılar 2 qrupda mübarizə aparırlar.
Yarışda A qrupunda Rusiya, Bolqarıstan, Belarus, Qazaxıstan, Azərbaycan, B qrupunda isə İran, Türkiyə, ABŞ, Yaponiya və Gürcüstan milliləri yer almışlar.
Millimiz ilk görüşünü Rusiya komandasına qarşı keçirmişdir. Yarışda Mahmud Maqomedov (55 kq, Azərbaycan) Sanna Artsa (Rusiya), Hacı Əliyev (60 kq) Aleksandr Baqmayevə, Cəbrayıl Həsənov (66 kq) Rəsul Murtuzəliyevə, Əşrəf Əliyev (74 kq) Ramazan Şamsudinova, Şərif Şərifov (84 kq) Maqomed İbrahimova, Xetqa Qazyumov (96 kq) Şamil Əhmədova, Cəmaləddin Maqomedov (120 kq) Məhəmmədhacı Nurasulova qalib gəlmişlər. Beləliklə, görüş 7:0 hesabı ilə güləşçilərimizin xeyrinə başa çatmışdır.
Yığmamız növbəti görüşünü Bolqarıstan idmançılarına qarşı keçirmişdir. Qarşılaşmada M.Maqomedov (55 kq, Azərbaycan) Mehmet Ferahimdən (Bolqarıstan), Ağahüseyn Mustafayev (60 kq) Vladimir Dubovdan, Aleksandr Qostiyev (74 kq) İvan Deliverskidən, X.Qazyumov (96 kq) Georgi Sredkovdan, C.Maqomedov (120 kq) isə Dmitri Tunçevdən üstün olmuşlar. C.Həsənov və Ş.Şərifovun rəqibləri xalça üzərinə çıxmamışlar. Bu görüşdə də millimiz 7:0 hesablı qələbə qazanmışdır.
Dünya Kuboku yarışlarında qrupun liderləri finalda, qrup ikinciləri isə üçüncülük uğrunda qarşılaşacaqlar.
Bölmənin digər xəbərləri
