BAKIDA SƏRBƏST GÜLƏŞ ÜZRƏ DÜNYA KUBOKU YARIŞLARI KEÇİRİLƏCƏK

09.03.2004 [19:25]
Çap et
A⁺ A^-

Dünyanın ən güclü sərbəst güləşçiləri aprelin 2-də Bakıda İdman- konsert kompleksində başlayacaq sərbəst güləş üzrə Dünya kuboku yarışlarında iştirak edəcəklər.

Gənclər, İdman və Turizm Nazirliyinin mətbuat xidmətindən AZƏRTAC-ın müxbirinə bildirmişlər ki, yarışlarda Avropanı Rusiya, Cənubi Amerikanı Kuba, Şimali Amerikanı Kanada, Asiyanı İran, Afrikanı CAR idmançıları təmsil edəcəklər.

Komandamızın tərkibinə Afina Olimpiadasına lisenziya qazanmış idmançılar – Sidney Olimpiadasının qalibi Namiq Abdullayev (55 kq), dünya çempionu Arif Abdullayev (60 kq), Avropa çempionatının finalçısı Elman Əsgərov (66 kq), Elnur Aslanov (74 kq) və Rüstəm Ağayev (96 kq) daxildirlər.

Yarışlarda iştirak edən ölkələrin güləş federasiyalarının rəhbərliyi Dünya kuboku yarışlarına qarşıdakı Olimpiya oyunlarına başlıca hazırlıq mərhələsi kimi baxırlar.

Yarışların təşkilat komitəsinə Azərbaycan Güləş Federasiyasının prezidenti Abbas Abbasov başçılıq edir.