Bakıda “SHE Congress” beynəlxalq qadınlar konqresi keçirilib
Bakı, 17 may, AZƏRTAC
Mayın 17-də Bakıda “SHE Congress” beynəlxalq qadınlar konqresi təşkil edilib.
AZƏRTAC xəbər verir ki, əvvəlcə tədbirdə Azərbaycanın Dövlət Himni səsləndirilib.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Azərbaycanda qadınların hüquqlarının qorunmasının dövlət siyasətinin prioritet istiqamətlərindən biri olduğunu vurğulayıb. O, Şərqdə qadına seçmək və seçilmək hüququnun ilk dəfə Azərbaycanda 1918-ci ildə verildiyini diqqətə çatdırıb.
Komitə sədri qeyd edib ki, Ümummilli Lider Heydər Əliyev qadınların idarəetmədə iştirakına və irəli çəkilməsinə hər zaman önəm verib. Ulu Öndər qadın hüquqlarının müdafiəsini siyasi fəaliyyətinin tərkib hissəsi hesab edib, milli qadın hərəkatının formalaşması, institutlaşması üçün böyük işlər görüb. Bu gün bu siyasəti uğurla davam etdirən Prezident İlham Əliyev, Azərbaycanda qadın sahibkarlığının inkişafı, qadınların hüquqlarının qorunması istiqamətində bir sıra önəmli sənədlər imzalayıb. Ölkəmizdə sahibkar qadınlarımızın, assosiasiyaların, cəmiyyətlərin sayı günbəgün artır.
Vurğulanıb ki, Heydər Əliyev Fondunun prezidenti Mehriban Əliyeva özünün həm ictimai-siyasi fəaliyyəti, həm də elmi yaradıcılığı ilə müasir dövrdə Azərbaycan qadınlarına nümunədir. O, müasir Azərbaycan qadın hərəkatının lideri kimi ölkəmizin tərəqqisi naminə mühüm işlər görür.
Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov bildirib ki, hər bir ölkənin dayanıqlı iqtisadi inkişafı qadın sahibkarlığının inkişafı ilə birbaşa bağlıdır. Qadınların ölkəmizin ictimai, siyasi və iqtisadi həyatında rolunun artırılması dövlətimizin daim diqqət mərkəzində olub. Bu il 100 illiyini qeyd etdiyimiz Ümummilli Lider Heydər Əliyev tərəfindən formalaşdırılmış müasir dövlət qadın siyasəti ölkə rəhbərliyi tərəfindən uğurla davam etdirilir. Bu qayğının nəticəsi olaraq hazırda ölkəmizdə qadın sahibkarlığının çəkisinin artmasını müşahidə edirik və qadınlar kiçik biznes yaratmağa, özünüməşğulluğa getdikcə daha çox meyil göstərirlər. Əgər 2018-ci ildə fərdi sahibkarlar arasında qadınların çəkisi 19 faiz civarında isə, 2023-cü ilin aprel ayının statistikasına əsasən bu rəqəm artıq 22 faizi keçib. Bununla yanaşı, hüquqi şəxslərin və müəssisələrin təsisçiləri və idarəediciləri sırasında kifayət qədər qadın təmsil olunur. Eyni zamanda, ölkəmizdə iqtisadi fəal əhalinin 49 faizini qadınlar təşkil edirlər.
O.Məmmədov qeyd edib ki, KOBİA-nın strukturuna daxil olan KOB İnkişaf Mərkəzləri tərəfindən 2023-cü il ərzində keçirilən təlimlərdə minə yaxın qadın sahibkar və sahibkarlıq fəaliyyətinə başlamaq istəyən qadın yararlanıb. Ötən müddət ərzində 9 qadın sahibkara təqdim etdikləri layihə çərçivəsində qrant, 10-dan artıq qadın sahibkara 3 il müddətinə innovasiya fəaliyyətindən əldə etdikləri gəlirlər üzrə mənfəət və gəlir vergisindən azad edən “Startap” şəhadətnaməsi verilib. Qabaqcıl ölkələrin təcrübəsinin öyrənilməsi məqsədilə həyata keçirilən “Menecerlərin təlimi üzrə Almaniya-Azərbaycan birgə Proqramı” çərçivəsində 100-dən çox qadın yararlanıb. Həmçinin, KOBİA qadınların istehsal etdikləri məhsulların bazarlara çıxarılması və tanıdılması məqsədilə müxtəlif ixtisaslaşmış sərgilərdə iştirakına dəstək göstərir. Bu günədək 1300-ə yaxın sahibkarlıq subyekti KOBİA tərəfindən təşkil olunan 50-yə qədər sərgidən faydalanıb ki, onların da 50 faizi qadın olub.
Vurğulanıb ki, qadın sahibkarlar işğaldan azad olunmuş ərazilərimizdə biznes qurmağa da maraq göstərirlər. Müvafiq məqsədlə KOBİA-ya daxil olmuş müraciətlərin 80-ə yaxını qadın sahibkarlara məxsusdur. Layihələr ticarət, xidmət, sənaye, kənd təsərrüfatı, turizm, təhsil və digər sahələri əhatə edir.
Tədbirdə Azərbaycan Biznes Qadın Təşkilatının təsisçisi Tatyana Mikayılova, “Yelo Bank”ın icraçı direktoru Anar Həsənov və digər çıxış edənlər “SHE Congress” layihəsi barədə məlumat veriblər. Bildirilib ki, layihənin əsas məqsədi biznesdə öz sözünü demiş, ailə həyatını və analığı karyerası ilə uğurla uyğunlaşdıra bilən qadınların öz təcrübələrini çətinlik çəkən və biznesdə ilk addımlarını atanlarla bölüşməkdir.
Xatırladaq ki, “SHE Congress” beynəlxalq qadınlar konqresinin əsası 2014-cü ildə Kiyevdə qoyulub.
Bölmənin digər xəbərləri
