Bakıda “Venesuela, Latın Amerikası və Karib hövzəsi – Sülh zonası” mövzusunda konfrans keçirilib
Bakı, 14 oktyabr, AZƏRTAC
Oktyabrın 14-də Bakıda Venesuela Bolivar Respublikasının Azərbaycan Respublikasındakı səfirliyi tərəfindən “Venesuela, Latın Amerikası və Karib hövzəsi – Sülh zonası” mövzusunda konfrans keçirilib.
AZƏRTAC xəbər verir ki, tədbirdə Venesuelanın Azərbaycandakı səfiri Kristofer Martinez çıxış edərək ölkəsinin son illərdə qarşılaşdığı iqtisadi və sosial çağırışlar, eləcə də həyata keçirilən islahatlar barədə danışıb.
Qeyd olunub ki, Venesuela müxtəlif çətinliklər fonunda öz iqtisadi modelini yenidən qurur, sosial rifahın təmin olunması və milli resursların səmərəli istifadəsi istiqamətində addımlar atır. Bildirilib ki, ölkənin neft, qaz və digər təbii ehtiyatları iqtisadi inkişafın əsas dayaqlarından biri olaraq qiymətləndirilir.
Səfir çıxışında, həmçinin regional sabitliyin və əməkdaşlığın qorunmasının vacibliyini vurğulayaraq, Latın Amerikası və Karib hövzəsinin sülh zonası kimi tanınmasının əhəmiyyətindən danışıb. O, bu regionda sülh və qarşılıqlı hörmət əsasında münasibətlərin inkişafının vacib olduğunu qeyd edib.
Konfrans çərçivəsində Venesuelada son illərdə aparılan demokratik islahatlara, seçki proseslərinə və vətəndaş iştirakçılığına dair məlumatlar da təqdim olunub. Qeyd edilib ki, ölkədə keçirilən çoxsaylı seçkilər və yerli icmalar səviyyəsində aparılan islahatlar demokratik idarəçiliyin gücləndirilməsinə xidmət edir.
Tədbirin sonunda iştirakçıların sualları cavablandırılıb.
Bölmənin digər xəbərləri
