Bakıda “Yaddaş yaşayır, çünki şahidlik edir” adlı anım tədbiri keçirilib
Bakı, 16 yanvar, AZƏRTAC
Yanvarın 16-da Bakıda Leopold və Mstislav Rostropoviçlərin Ev–muzeyi və Litva Respublikasının Azərbaycan Respublikasındakı səfirliyinin birgə təşkilatçılığı ilə Azərbaycan xalqının 20 Yanvar və Litva xalqının 13 Yanvar faciələrinin ildönümünə həsr olunmuş “Yaddaş yaşayır, çünki şahidlik edir” adlı anım tədbiri keçirilib.
AZƏRTAC xəbər verir ki, tədbirin əsas məqsədi azadlıq və müstəqillik uğrunda canlarını fəda etmiş insanların xatirəsinin əbədiləşdirilməsi, tarixi yaddaşın qorunması, eləcə də Azərbaycan və Litva xalqları arasında beynəlxalq həmrəyliyin ifadəsidir.
Anım tədbiri yanvar faciələri nəticəsində həlak olmuş şəxslərin xatirəsinin bir dəqiqəlik sükutla yad edilməsi ilə başlayıb. Muzeyin direktoru vəzifəsini icra edən Günay Əliyeva çıxışında 20 Yanvar hadisələrinin Azərbaycan xalqının tarixi yaddaşında silinməz iz buraxdığını və milli müstəqillik uğrunda mübarizənin simvoluna çevrildiyini vurğulayıb.
Daha sonra Litva Respublikasının ölkəmizdəki fövqəladə və səlahiyyətli səfiri Kestutis Vaşkeleviçus yanvar hadisələrinin tarixi əhəmiyyətini qeyd edərək, bu faciələrin hər iki ölkə xalqının azadlıq hərəkatında mühüm rol oynadığını, azadlıq və suverenlik dəyərləri baxımından ortaq taleləri əks etdirdiyini bildirib.
Tədbirdə ekspert qismində çıxış edən Tarix İnstitutunun elmi işlər üzrə direktor müavini, tarix elmləri doktoru İlqar Niftəliyev yanvar faciələrinə elmi-tarixi qiymət verərək, bu hadisələrin Azərbaycan və Litvanın dövlətçilik tarixində tutduğu yer və nəticələri barədə fikirlərini bölüşüb.
Tədbir çərçivəsində 13 Yanvar və 20 Yanvar faciələrinə həsr olunmuş foto və video materiallar nümayiş etdirilib. Təqdim olunan kadrlar iki xalqın keçdiyi azadlıq yolunu, insan talelərini və tarixi hadisələrin xronikasını əks etdirib.
Proqramın mühüm hissələrindən biri Azərbaycan Milli Konservatoriyasının nəzdində İncəsənət Gimnaziyasının şagirdlərinin əl işlərindən ibarət rəsm sərgisi olub. Sərgidə nümayiş etdirilən əsərlər uşaqların dünyaya baxışını, azadlığa can atma hissini və humanist dəyərləri ifadə etməklə yanaşı, faciəvi hadisələrin yaddaşının gələcək nəsillərin şüurunda yaşadılmasının vacibliyini ön plana çıxarıb.
Anım gecəsi konsert proqramı ilə davam edib. Bülbül adına Orta İxtisas Musiqi Məktəbinin şagirdlərinin ifasında səsləndirilən yerli və xarici bəstəkarların klassik əsərləri tədbirə xüsusi mənəvi ovqat bəxş edərək, həlak olanların xatirəsinə ehtiramın musiqili ifadəsinə çevrilib.
Bölmənin digər xəbərləri
