Bakıda yanvar faciəsi qurbanlarının xatirəsi Krımda yad edilmişdir
Bakı, 21 yanvar (AZƏRTAC). 1990-cı ilin yanvarında Bakıda baş vermiş faciəli hadisələrin növbəti ildönümü ilə əlaqədar Krımın paytaxtı Simferopolda anım tədbiri keçirilmişdir. Krımın Azərbaycanlılar İcmasının rəhbəri Rəhim Hümbətov AZƏRTAC-a bildirmişdir ki, anım tədbiri bu icma tərəfindən təşkil edilmişdir.
İvan Franko adına respublika kitabxanasında Qara Yanvar hadisələrinə həsr edilmiş informasiya materiallarının sərgisi təşkil olunmuşdur. Anım gecəsində Azərbaycanın müstəqilliyi uğrunda həlak olmuş qəhrəmanların xatirəsi bir dəqiqəlik sükutla yad edilmişdir. Bakıda faciəli yanvar hadisələri haqqında film nümayiş etdirilmişdir.
O vaxt Bakıdakı şəhər xəstəxanalarından birində həkim işləyən, hazırda Simferopolda yaşayan Ülvi Hüseyn yanvar qırğınının yaralı qurbanlarının həmin xəstəxanaya gətirilməsi barədə xatirələrini söyləmişdir.
İcmanın “Gənclər forumu” azərbaycanlı gənclərin daha fəal olduğu Nikolayev şəhəri ilə videorabitə təşkil etmişdir.
Anım gecəsində müxtəlif xalqların nümayəndələri iştirak edirdi. Onu da deyək ki, Krımda bu cür anım tədbirləri 1991-ci ildən keçirilir.
Bölmənin digər xəbərləri
