BAKIDA YENİ İDMAN-ƏYLƏNCƏ KOMPLEKSİ İSTİFADƏYƏ VERİLMİŞDİR
AZƏRTAC xəbər verir ki, mayın 28-də Bakının Nizami rayonunda yeni “Start” İdman-Əyləncə Kompleksi istifadəyə verilmişdir.
Ən müasir tələblərə cavab verən kompleksdə, üzgüçülük hovuzu, trenajor zalı fəaliyyət göstərir. Burada idmançılar basketbol, voleybol, həndbolla da məşğul ola biləcəklər.
Bundan əlavə iki mini-futbol meydançası da tikilib istifadəyə verilmiş, boulinqlə məşğul olmaq üçün hər cür şərait yaradılmışdır.
Açılış mərasimində çıxış edən Azərbaycan gənclər və idman naziri Azad Rəhimov, təhsil nazirinin müavini Elmar Qasımov və başqaları bu cür komplekslərin istifadəyə verilməsinin dövlətin idmana göstərdiyi diqqət və qayğının bariz nümunəsi olduğunu söyləmişlər. Qeyd olunmuşdur ki, bu cür komplekslər Azərbaycan əhalisinin daha sağlam inkişafına xidmət etməklə yanaşı, onların idmanla fəal məşğul olmaları üçün də şərait yaradacaqdır.
Mərasimdə ötən il ölkə çempionu olmuş, bu mövsüm isə bürünc medallara layiq görülmüş “Bakı” klubunun futbolçularına medallar təqdim edilmişdir.
Bölmənin digər xəbərləri
