BAKININ 1918-Cİ İLDƏ ERMƏNİ İŞĞALINDAN AZAD OLUNMASI İLƏ BAĞLI ELMİ KONFRANS KEÇİRİLMİŞDİR

14.09.2004 [22:14]
Çap et
A⁺ A^-

AZƏRTAC-ın müxbiri xəbər verir ki, Tərxis Olunmuş Hərbçilərin Gəncləri Maarifləndirmə İctimai Birliyi, Atatürk mərkəzi və Türkiyənin ölkəmizdəki səfirliyi Milli Elmlər Akademiyasında 1918-ci ildə Bakının erməni işğalından azad edilməsi mövzusunda birgə elmi konfrans keçirmişlər. Milli Məclisin deputatları, Türkiyə və Azərbaycandan olan tanınmış elm adamları, tarixçi alimlər və ictimaiyyətin nümayəndələri tədbirdə çıxış etmişlər.

Onlar I Dünya müharibəsinin Azərbaycana, eləcə də Türk dünyasına gətirdiyi bəlalardan, xalqlarımız arasında doğma münasibətlərdən, 1918-ci ildə Bakının erməni işğalından azad olunmasında Türkiyə ordusunun fəaliyyətindən və digər məsələlərdən danışmışlar. Qeyd olunmuşdur ki, xalqlarımız həmişə bir-birilərinə təmənnasız kömək etməkdən qürur duymuşdur.

Azərbaycanın Macarıstandakı səfiri Həsən Həsənov və Türkiyənin Azərbaycandakı səfiri Əhməd Ünal Çeviköz Türkiyə-Azərbaycan münasibətlərinin bu günü və sabahı mövzusunda çıxış etmişlər. Natiqlər ölkələrimiz arasında qardaşlıq münasibətlərinin inkişaf etdirilməsində ümummilli liderimiz Heydər Əliyevin uzaqgörən siyasətini yüksək qiymətləndirmiş və əminliklə bildirmişlər ki, bu əlaqələr getdikcə genişləndiriləcəkdir.

Milli Elmlər Akademiyasının prezidenti, akademik Mahmud Kərimov konfransda iştirak etmişdir.

Axırda çıxış edənlərə xatirə hədiyyələri verilmişdir.