“Baku White City” və “Sea Breeze” birgə fəaliyyət haqqında saziş imzalayıblar VİDEO
Bakı, 22 may, AZƏRTAC
Ümumdünya Şəhərsalma Forumunun (WUF13) 13-cü Sessiyası çərçivəsində “Sea Breeze” ilə “Baku White City” arasında qarşılıqlı investisiyalar, davamlı ekoloji inkişaf və beynəlxalq investisiyaların cəlb edilməsi haqqında Saziş imzalanıb.
AZƏRTAC xəbər verir ki, sazişi “Sea Breeze” irimiqyaslı kurort şəhərinin təsisçisi Emin Ağalarov və “Baku White City” layihəsinin icraçı direktoru Ruslan Sadıxov imzalayıblar.
Bakıda keçirilən WUF13 növbəti səmərəli əməkdaşlığın formalaşması üçün platformaya çevrilib. Ölkənin iki aparıcı layihəsi gələcəyin “ağıllı”, ekoloji cəhətdən dayanıqlı şəhərlərinin inkişafı üçün Şərq və Qərb modellərinin kəsişməsində yerləşən dinamik şəhər mərkəzinin - Azərbaycan paytaxtının davamlı inkişaf prinsiplərinin daha da gücləndirilməsinə birgə səylərini yönəldəcək.
İrimiqyaslı “See Breeze” kurort şəhəri və “Baku White City” ekoloji şəhərsalma layihəsinin nailiyyətləri aparıcı ekspertlər tərəfindən Azərbaycanın paytaxtında keçirilən mötəbər qlobal tədbirdə şəhərlərin davamlı inkişafının nümunəsi kimi tanınıb.
Xəzər dənizinin sahilində həyata keçirilən “Sea Breeze” layihəsi “şəhərdə şəhər” konsepsiyası əsasında genişmiqyaslı şəhər inkişafı modeli kimi formalaşır. İlkin mərhələdə Xəzər sahili boyunca uzunluğu 7 kilometrdən başlayan layihə ümumilikdə 22-23 kilometr sahil zolağını əhatə edəcək. Layihə çərçivəsində yaşayış binaları, hotellər, ticarət obyektləri və müxtəlif infrastrukturların daxil olacağı 30 milyon kvadratmetrdən çox tikinti sahəsinin yaradılması planlaşdırılır. 2018-ci ildən sonra hotellər və yaşayış binaları üçün idarəetmə modeli tətbiq olundu. Bu sistem investorlar üçün böyük rahatlıq yaradır, çünki daşınmaz əmlakın idarə edilməsi, icarəyə verilməsi və satışı peşəkar səviyyədə həyata keçirilir. “Sea Breeze” daxilində süni yarımadalar və genişmiqyaslı zonalar yaradılır.
Planlaşdırılan 200 hektarlıq yeni “Fire Island” adlı süni adanın ərazisində yaşayış, ticarət və hotel infrastrukturu yaradılacaq və kompleks şəhər konsepsiyasının bir hissəsi olacaq. Yaşıllaşdırma və abadlıq işlərinə xüsusi diqqət yetirilir və artıq 11 milyondan çox bitki əkilib. Layihəni idarə etmək üçün rəqəmsal 3D modelləşdirmə və simulyasiya sistemlərindən istifadə olunur.
Qara şəhərin ağır çirklənmiş sənaye ərazisinin ekoloji cəhətdən təmiz, dayanıqlı, rahat şəhər mühitinə çevrilməsi məqsədilə “Baku White City” layihəsinə Azərbaycan Prezidenti İlham Əliyevin 2006-cı il 28 sentyabr tarixli Sərəncamı ilə təsdiq edilmiş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”nın icrası çərçivəsində başlanılıb.
Qara şəhərin şanlı neft keçmişinin nəticəsi ekoloji fəlakət idi, bunun aradan qaldırılması üçün genişmiqyaslı təmizlənməyə başlandı və Qara şəhər müasir şəhərsalma və şəhər mühitinin yenilənməsi nümunəsi olaraq Ağ şəhərə çevrilmə şansını qazandı.
Şəhər mühitinin ekoloji və iqlim problemlərinə uyğunlaşmasının simvoluna çevrilən Ağ şəhər 280 min nəfərə qədər gözlənilən əhalisi ilə 1650 hektar ərazidə planlaşdırılıb. Layihə üzərində azərbaycanlı mütəxəssislər və tanınmış “Atkins” mühəndislik, memarlıq və konsaltinq şirkəti, məşhur memar Norman Fosterin Bürosu, Amerikanın “F+A Architects” şirkəti və digər şirkətlərdən olan həmkarları birgə çalışıblar.
İmzalanma mərasimindən sonra keçirilən birgə brifinqdə çıxış edən Emin Ağalarov WUF13-ün Azərbaycanda keçirilməsinin böyük beynəlxalq səviyyəli tədbir olduğunu və ölkənin yüksək təşkilatçılıq bacarıqlarını nümayiş etdirdiyini qeyd edib. O, həmçinin “Sea Breeze” ilə “Baku White City” arasında əməkdaşlığın başlandığını elan edib.
Ruslan Sadıxov öz növbəsində imzalanmış sazişin ölkənin iki ən böyük inkişaf layihəsini birləşdirdiyini vurğulayıb. Onun sözlərinə görə, əməkdaşlıq davamlı inkişafın təmin edilməsinə, xarici investisiyaların cəlb edilməsinə, ən yaxşı beynəlxalq təcrübələrin və müasir yanaşmaların layihələrin icrasına və baş planlara inteqrasiyasına yönəlib.
O, həmçinin WUF13-ün Azərbaycanın şəhərsalma və davamlı inkişaf sahəsindəki nailiyyətlərini nümayiş etdirmək üçün mühüm beynəlxalq platformaya çevrildiyini və beynəlxalq iştirakçıların ciddi marağına səbəb olduğunu qeyd edib.
Bölmənin digər xəbərləri
