Ballıcaya qayıdan keçmiş məcburi köçkün: Ən böyük arzumuza çatmışıq
Xocalı, 29 aprel, Tahir Ağaməmmədov, AZƏRTAC
Mən Xocalını 20 yaşımda tərk etmişəm. Köçkünlük illərində müxtəlif yerlərdə məskunlaşdıq, çox çətinliklər gördük. Ən böyük arzumuz doğma Qarabağımıza qayıtmaq idi. Ali Baş Komandanın qətiyyəti, Ordumuzun gücü sayəsində Qarabağımız işğaldan azad olundu və biz arzumuza çatdıq, doğma yurdumuza qayıtdıq.
AZƏRTAC-ın bölgə müxbiri xəbər verir ki, bu sözləri Xocalı rayonunun Ballıca kəndinə köç edən keçmiş məcburi köçkün Zəfər Məmmədov söyləyib.
“Bizə bu sevinci yaşadan Prezidentimizə, Ordumuza təşəkkürümü bildirirəm. Allah şəhidlərimizə rəhmət eləsin, qazilərə cansağlığı versin”, - deyə o bildirib.
Qeyd edək ki, bu gün respublikanın müxtəlif şəhər və rayonlarından yola salınan 15 ailə olmaqla, 68 nəfər keçmiş məcburi köçkün doğma yurduna – Ballıcaya qovuşub. Ballıcaya köç karvanı ilə qayıdanlar respublikanın müxtəlif yerlərində, əsasən yataqxanalarda, sanatoriya və inzibati binalarda müvəqqəti məskunlaşmış ailələrdən ibarət olub. Bununla da, Ballıca kəndində 172 ailənin, yəni 811 nəfərin daimi məskunlaşması təmin olunub. Kəndə keçmiş məcburi köçkün ailələrinin köçürülməsi prosesi bundan sonra da davam edəcək.
Bölmənin digər xəbərləri
