Baş konsul: Heydər Əliyevin hakimiyyətə qayıdışından sonra Azərbaycan-Gürcüstan münasibətləri sürətlə inkişaf edib
Tbilisi, 14 dekabr, AZƏRTAC
Azərbaycanın Batumi şəhərindəki Baş konsulu Pərviz İsmayılzadə ümummilli lider Heydər Əliyevin vəfatının 18-ci ildönümü ilə əlaqədar Acarıstanın “TV12” kanalına müsahibə verib.
Bu barədə AZƏRTAC-a Baş konsulluqdan məlumat verilib.
Bildirilib ki, Baş konsul Ümummilli Liderin həyat və fəaliyyəti barədə kanalın tamaşaçılarına ətraflı məlumat verib. O qeyd edib ki, xatirəsini dərin hörmətlə andığımız, adını xalqımızın şanlı tarixinə qızıl hərflərlə yazdıran Heydər Əliyev dünyanın dahi şəxsiyyətlərdən biridir.
Baş konsul deyib ki, Gürcüstan Cənubi Qafqaz regionunda Azərbaycanın strateji tərəfdaşıdır. Hər iki ölkəni tarixi yaxınlıq, strateji, geopolitik və iqtisadi maraqlar birləşdirir. Ölkələrimiz müstəqilliklərinin ilk vaxtlarından yaxın əməkdaşlıq münasibətlərinin saxlanmasına çalışır. 1993-cü ildə Heydər Əliyevin Azərbaycanda hakimiyyətə qayıdışından sonra Azərbaycan-Gürcüstan münasibətləri sürətlə inkişaf edib. Heydər Əliyev və Eduard Şevardnadzenin qarşılıqlı səfərləri əməkdaşlığımızın möhkəmlənməsində mühüm rol oynayıb. Ulu Öndərin 1996-cı ilin martında Gürcüstana rəsmi səfəri zamanı ölkələrimiz arasında iki vacib sənəd - "Dostluq, əməkdaşlıq və qarşılıqlı təhlükəsizliyin möhkəmləndirilməsi haqqında müqavilə" və "Qafqaz regionunda sülh, təhlükəsizlik və əməkdaşlıq haqqında bəyannamə" imzalanıb. Azərbaycanın və Gürcüstanın dövlət başçıları mətbuat konfransında verdikləri bəyanatda həmin sazişlərin xüsusi əhəmiyyət daşıdığını bildiriblər. Ulu öndər Heydər Əliyevin yeritdiyi bu siyasətin əsas tərkib hissəsi kimi, qonşu dövlətlərlə, xüsusilə Gürcüstanla münasibətlərə böyük diqqət yetirməsi isə Azərbaycan-Gürcüstan münasibətlərinin keyfiyyətcə yeni mərhələyə qədəm qoymasına şərait yaratdı.
Müdrik və uzaqgörən siyasətçi olan Heydər Əliyev Azərbaycan və gürcü xalqlarının tarixi dostluğuna və mehriban münasibətlərinin daha da inkişafına xidmət edən vacib məqamlara həmişə böyük diqqət yetirib. Tbilisidə işıq üzü görmüş "Heydər Əliyev və Gürcüstan" kitabında bu böyük dövlət adamının, dünyaşöhrətli uzaqgörən siyasətçinin Gürcüstan ilə münasibətlərindən - bu ölkəyə səfərlərindən, gürcü xalqına münasibətindən, dar gündə qonşuya necə əl tutmağın bariz nümunəsindən söhbət açılır.
Azərbaycanla Gürcüstanı siyasi müttəfiqlikdən başqa sıx iqtisadi və enerji tərəfdaşlığının birləşdirdiyini qeyd edən Baş konsul deyib: “Azərbaycan neftini dünya bazarına çıxaran Bakı-Supsa (1999) və Bakı-Tbilisi-Ceyhan (2006) neft kəməri Gürcüstan ərazisindən keçir. Bakı-Tbilisi-Qars dəmir yolu xətti öz növbəsində ölkələrarası ticari əlaqələrin inkişafına xidmət edir.
“Hazırda Ş.Rustaveli adına Batumi Dövlət Universitetində “Heydər Əliyev adına Azərbaycanşünaslıq Mərkəzi” və “Acarıstan-Naxçıvan Muxtar Respublikası dostluq auditoriyası” fəaliyyət göstərir. Heydər Əliyevin anadan olduğu Naxçıvanla Acarıstan qardaşlaşmış muxtar respublikalardır.
Hələ sağlığında millətimizin Ümummilli Liderinə çevrilmiş bu böyük düha sahibi özündən sonra elə bir miras qoyub ki, neçə-neçə nəsillər ondan bəhrələnəcək. Məhz Ulu Öndərin təməlini qoyduğu sülh strategiyası, səmimi və mehriban qonşuluq, qarşılıqlı faydalı və strateji tərəfdaşlıq, dostluq siyasəti bu gün onun göstərdiyi yolun layiqli davamçısı Prezident İlham Əliyev tərəfindən uğurla davam etdirilir”.
P.İsmayılzadənin sözlərinə görə, dövlətimizin başçısının gərgin fəaliyyətində onun ən yaxın silahdaşı Azərbaycan Respublikasının birinci vitse-prezidenti, Heydər Əliyev Fondunun prezidenti Mehriban Əliyevadır.
Prezident İlham Əliyev öz müsahibələrində qeyd edib: “Zaman onu da sübut edir ki, dünyanın tarixi böyük şəxsiyyətlərin tərcümeyi-halıdır. Heydər Əliyevin tərcümeyi-halı isə Azərbaycan tarixidir”.
Azərbaycan Respublikasının Prezidenti İlham Əliyev Ulu Öndərin yürütdüyü siyasətin uğurlu davamçısıdır və hazırda da ölkələrimiz arasında qurulmuş dostluq və tərəfdaşlıq münasibətləri yüksələn dinamika ilə inkişaf edir.
Qeyd edək ki, ümummilli lider Heydər Əliyevin vəfatının 18-ci ildönümü ilə əlaqədar Acarıstanın Ali Şurasının sədri Davit Qabaidze, Şuranın üzvləri Lado Mqalobalisvili, Acarıstanın maliyyə və iqtisadiyyat naziri Jaba Putkaradze, Gürcüstanın Azərbaycandakı səfiri Zurab Pataradze, Niko Berdzenişvili adına Batumi Elmi-Tədqiqat İnstitutunun əməkdaşı, fəlsəfə elmləri doktoru, sosioloq Nuqzar Çxaidze də “TV12” kanalına müsahibə veriblər.
Onlar Azərbaycan ilə Gürcüstan arasında mehriban qonşuluq və strateji əməkdaşlığın yüksək səviyyədə inkişaf etməsində Heydər Əliyevin xidmətlərini xüsusi qeyd ediblər.
Çıxış edənlər Heydər Əliyevin və Eduard Şevardnadzenin dostluğu, əməkdaşlığı nəticəsində baş tutan əlaqələrin iki ölkə tərəfindən bu günə qədər ən yüksək səviyyədə və keyfiyyətli şəkildə davam etdirildiyini vurğulayıblar.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
