Baş məşqçi: Uğurlu seriyanı “Neftçi” ilə oyunlarda da davam etdirmək niyyətindəyik
Bakı, 22 aprel, AZƏRTAC
Dörd komanda yarımfinala yüksəlib. Liqanın ən güclü kollektivləri artıq finala vəsiqə uğrunda mübarizə aparacaq. Məncə, bu mərhələdə sürpriz nəticə qeydə alınmadı, gözlənilən komandalar yarımfinala adladı.
Bu sözləri AZƏRTAC-a açıqlamasında “Abşeron Lions” klubunun baş məşqçisi Erhan Toker Azərbaycan Basketbol Liqasının bu gün start götürəcək yarımfinal mərhələsi barədə danışarkən deyib.
Türkiyəli mütəxəssis bildirib ki, komanda mövsümün əvvəlindən etibarən uğurlu çıxış etməyə və qələbələr qazanmağa çalışır: “Bu xətti “Neftçi” ilə oyunlarda da davam etdirmək niyyətindəyik. Hər iki komandada zədəli oyunçular var. Bundan əlavə, xırda zədələr və xəstəliklər də olur. “Sabah”ın vəziyyəti barədə isə tam məlumatım yoxdur. Son matçda əsas basketbolçulardan biri iştirak etməmişdi. Onun zədə səbəbindən, yoxsa istirahət məqsədilə heyətdən kənarda qaldığını dəqiq bilmirəm. Hər zamankı kimi meydançaya qələbə üçün çıxacağıq. Mövsümboyu bütün oyunlara qalib gəlmək məqsədilə hazırlaşmışıq. Rəqibin kimliyindən asılı olmayaraq, eyni prinsipə sadiq qalırıq. Finala yüksələ bilsək, bu, bizi çox sevindirər”.
E.Toker “Neftçi” ilə ilk görüşün əhəmiyyətini xüsusi vurğulayıb: “İlk oyun həm nəticə, həm də psixoloji üstünlük baxımından vacibdir. Bununla belə, ötən mövsümdə ilk görüşü uduzub seriyanı qazandığımız hallar da olub. Ümid edirəm ki, azarkeşlər maraqlı qarşılaşmalar izləyəcək və yarımfinal mərhələsi basketbolsevərlər üçün zövqlü, gərgin mübarizə ilə yadda qalacaq”.
Baş məşqçinin sözlərinə görə, iki qələbə qazanan komanda növbəti mərhələyə yüksələcək: “Bu baxımdan, seriya formatı kubok oyunlarından fərqlənir. Rəqib də ciddi hazırlaşır. “Neftçi”də baş məşqçi dəyişikliyi olub və hazırda komandaya Daviti Çivçivadze rəhbərlik edir. Onların yaxşı hazırlaşacağını düşünürəm. Qarşılaşmalarım taleyini əsasən meydandakı performans müəyyənləşdirir. Məşqçilər əvvəlcədən müxtəlif planlar hazırlayırlar. Lakin əsas məsələ oyunçuların meydanda buna necə reaksiya verməsidir. Həmin gün komandanın çıxışı həlledici rol oynayır. Yarımfinal və final mərhələləri daha gərgin keçir. Bu, basketbolun təbiətindən irəli gəlir. Oyunçular maksimum nəticə qazanmaq üçün əllərindən gələni edirlər. Qarşılaşmanın necə keçəcəyini maraqla gözləyirəm”.
“Abşeron Lions”dakı gələcəyindən də söz açan mütəxəssis müqaviləsinin mövsümün sonuna qədər qüvvədə olduğunu diqqətə çatdırıb: “Hazırda klubla aramızda heç bir problem yoxdur. Gələcəklə bağlı qərar mövsümün sonunda veriləcək. Bu, yalnız mənim istəyimdən asılı deyil, klub rəhbərliyinin mövqeyi də həlledici olacaq”.
Qeyd edək ki, yarımfinal mərhələsinin ilk oyun günündə bu gün “Sabah” və “Gəncə” komandaları üz-üzə gələcək. Digər görüş isə aprelin 23-də “Abşeron Lions” və “Neftçi” arasında keçiriləcək.
Bölmənin digər xəbərləri
