BELARUS PREZİDENTİ ALEKSANDR LUKAŞENKONUN NİTQİ
-Hörmətli cənab Prezident!
Hörmətli Mehriban xanım!
Hörmətli dostlar!
İcazə verin, bu gün hər yerdə qarşılaşdığımız səmimiyyətə, əsl dostluq ab-havasına görə İlham Heydər oğluna ürəkdən təşəkkürümü bildirim.
Dövlətlərimizin coğrafi cəhətdən uzaqlığına baxmayaraq, xalqlarımız onilliklər boyu sıx dostluq telləri ilə bağlıdırlar. Biz sizin gözəl ölkənizə çox böyük hörmət bəsləyirik. O, bu gün şəxsən mənim üçün daha gözəl oldu, çünki mən Azərbaycanı və onun paytaxtını öz gözlərimlə gördüm.
Təəssüf ki, müstəqilliyimizin birinci mərhələsində dövlətlərimiz tarixin ağır illərini yaşamalı oldular. Belarusda bu, sizdə baş vermiş qarşıdurmaya çevrilmədi. İlham Heydər oğlu, mən istərdim ki, Siz bunu biləsiniz, Siz isə Belarus xalqının qəlbinə bələdsiniz: bu hadisələrin bizim doğma Belarusdan min kilometrlərlə uzaqda baş verməsinə baxmayaraq, biz burada Sovet İttifaqı dövründə cərəyan edən prosesləri, faciəli hadisələri çox böyük qəlb ağrısı ilə izləyirdik. Minlərlə gəncin dəfn olunduğu xiyabanı ziyarət edərkən biz tarixinizin bu dövrünü yeni bir tərzdə, çox böyük ürək ağrısı ilə hiss etdik.
İlham Heydər oğlu, Sizə ən başlıcası bunu arzu edirəm ki, mehriban, istedadlı, tolerant xalqınız indiyədək üzləşdiyi bəlalardan uzaq olsun. Mən bunu ona görə deyirəm ki, ölkənizin qüdrətli olmasına baxmayaraq, dünyamızda başqalarının sərvətində gözü olan quzğunlar hələ kifayət qədərdir. Ölkə varlı olduqca, perspektivləri geniş olduqca, bu ərazidə yaşayan xalq bir o qədər etibarlı müdafiə edilməlidir. Bizim aramızda problemli məsələlərin olmadığını və Belarus ilə Azərbaycan arasında əməkdaşlıq üçün bağlı mövzuların olmadığını deyərək, bir daha vurğulayıram ki, əldə etdiyimiz bütün razılaşmalar, digər dövlətlər tərəfindən olan müxtəlif narazılıqlara, əngəllərə baxmayaraq, vaxtında yerinə yetiriləcəkdir. Biz suverən və müstəqil dövlətlərik, Belarus da, Azərbaycan da son illər öz suverenliyini və müstəqilliyini dəfələrlə sübut etmişdir.
Bir vaxtlar münasibətlərimizin kəsilməsinə, bir-birimizdən uzaqlaşmağımıza, ölkələrimiz arasında ticarət əlaqələrinin, əslində, pozulmasına baxmayaraq, bu gün sizin kimi, mən də sevinirəm ki, dövlətlərimiz arasında münasibətlər nizama düşür. Bu münasibətlərin əsasını, demək olar ki, qeyri-düzgün siyasətdən uzaq olan iqtisadiyyat təşkil edir. Daha doğrusu, Sizinlə gəldiyimiz qənaətə görə, bizim iqtisadiyyatımız hər hansı siyasətdən uzaqdır, hərçənd, nəyinsə siyasətdən uzaq olmasını təsəvvür etmək çətindir. Lakin bizim iqtisadiyyatımız siyasiləşdirilməmişdir. Əgər siyasət varsa da o, bizim normal ticarət-iqtisadi münasibətlər yaradılması sahəsində əməkdaşlığımıza bənzəyir.
İlham Heydər oğlu, mən bilirəm ki, Belarusa səfərinizdən sonra biz Sizin qarşınızda bir sıra həssas məsələ qaldırdıq, çünki onlar digər dövlətlərin mənafelərinə, indiki halda bizə qardaş olan Rusiyanın mənafelərinə toxunurdu, xüsusilə bizə enerji daşıyıcılarının və s. göndərilməsi sahəsində. Bu, Rusiya Federasiyasının ənənəvi bazarına aid idi. Biz anlayırdıq ki, bu, Sizin üçün ona görə çətin məsələ deyildir ki, ölkənizin nəyisə çatışmır və yaxud siz bunu satmağa hazır deyilsiniz, ona görə ki, - mən bir daha vurğulayıram, - bu, bir çox dövlətlərin, ilk növbədə, Rusiya Federasiyasının mənafelərinə toxunurdu. Lakin biz Sizə minnətdarıq ki, Siz düzgün, səmimi, açıq, beynəlxalq münasibətlərdə qəbul olunduğu kimi, müstəqil, suveren dövlət kimi açıq-aydın dediniz: bəli, biz qardaş Belarus xalqı ilə əməkdaşlıq etməyə hazırıq, gəlib bütün sərvətlərimizdən beynəlxalq ticarət və beynəlxalq əməkdaşlıq prinsipləri əsasında istifadə edə bilərsiniz. Biz bunu xatırlayırıq və uzun müddət unutmayacağıq. Hələ heç bir dövlət digər dövlətlərin mənafelərinə toxunan həssas məsələlərə belə açıq-aydın cavab verməmişdir.
Beş il ərzində ölkələrimiz arasında əmtəə dövriyyəsi təxminən 5 dəfə artmışdır. Lakin 40 milyon dollar səviyyəsində əmtəə dövriyyəsi bizi təmin edə bilməz. Düşünürəm ki, biz əməkdaşlıq edərək, iqtisadiyyatlarımızın yüksəlişini nəzərə alaraq, 2-3 il ərzində əmtəə dövriyyəsini yarım milyard dollar səviyyəsinə qaldıra bilərik. Biz bu gün bir-birimizə daha yaxın olduq. Rusiya Federasiyası ilə aramızda baş verən ixtilaf bizi Azərbaycana məhsul göndərilməsi və Azərbaycandan məhsul alınması marşrutlarınadək əməkdaşlıq istiqamətinin konkret yollarını işləyib hazırlamağa məcbur etdi.
Bu, çox qiymətlidir və Azərbaycan mütəxəssislərinə minnətdarıq ki, İlham Heydər oğlu, Sizin göstərişinizlə onlar xahişimizə cavab verdilər, bizi hər vasitə ilə dəstəklədilər və kömək etdilər. Çox şadam ki, bu gün biz təkcə dövlətlərimizin deyil, bütün idarələrimizin də münasibətlərini normativ hüquqi baza üzərinə keçirməyə müvəffəq olduq. Bu, çox qiymətlidir. Burada olan iri təşkilat və idarə rəhbərlərinin hamısı Azərbaycanın oxşar qurumları ilə müqavilə və sazişlər imzalamışdır. Bu, çox yaxşıdır. Deyim ki, mən biləni, bizdə 13 ildə hələ heç vaxt belə hal olmayıbdır. Çox yaxşı haldır ki, elmi müəssisələrdən tutmuş məhsul istehsal edən şirkətlərədək bilavasitə rəhbərlər birbaşa müqavilə və sazişlər imzalayırlar. Deməli, razılaşdırdığımız nə varsa, hamısı həyata keçiriləcəkdir. Müdrik bir Azərbaycan atalar sözündə deyildiyi kimi, “yol addım-addım qət edilər, dama-dama göl olar”.
İlham Heydər oğlu, mən qəti əminəm ki, damla-damla doldurmaq əzmində olduğumuz həmin göl xalqlarımız arasındakı qarşılıqlı münasibətlər və dostluq kimi, saf və şəffaf olacaqdır.
Hörmətli dostlar!
Siz indicə öz Prezidentinizin dili ilə dediniz ki, ölkəmizdə baş verən hadisələrə sevinir və həyəcan keçirirsiniz. Bu, Belarus xalqının ruhuna uyğundur. Burada biz vaxtilə qardaş olan respublikanın, indi isə müstəqil, perspektivli, güclü dövlətin simasında özümüzə yeni, mehriban, sınaqdan çıxmış dost tapdıq.
Cənab Prezident, Sizi əmin etmək istəyirəm ki, vaxtilə Belarusun etdiyi kimi, Siz də öz seçiminizə heyfsilənməyəcəksiniz. Biz həmişə Sizin etibarlı dostlarınız olacağıq.
Bu gün mən, təbii ki, Sizin sağlığınıza badə qaldırıram, - hərçənd, çox cavan olan bir adamın sağlamlığından danışmaq yaxşı düşmür, - bu badəni Sizin xalqınızın şərəfinə, Belarus və Azərbaycan xalqları arasında dostluğun şərəfinə, uşaqlarınızın şərəfinə qaldırmaq istəyirəm, qoy gözəl uşaqlarınız Sizi həmişə sevindirsinlər, ailənizə nəinki qüssə-kədər, hətta pis ovqat da gətirməsinlər.
Sizin şərəfinizə, ailənizin şərəfinə, xalqınızın şərəfinə, dövlətinizin şərəfinə. İndən belə biz də Azərbaycanı müşahidə edəcək və onun bütün sahələrdə uğurlarına sevinəcəyik.
(Dövlət başçılarının nitqləri diqqətlə dinlənildi və alqışlarla qarşılandı).
Bölmənin digər xəbərləri
