Belarusda Azərbaycanın Milli Qəhrəmanının 50 illik yubileyi qeyd olunub
Bakı, 30 mart, AZƏRTAC
Ölkəmizdə Azərbaycanın Milli qəhrəmanlarının xatirəsi həmişə əziz tutulur, onların yubileyləri dövlət səviyyəsində qeyd edilir.
Müdafiə Nazirliyinin mətbuat xidmətindən AZƏRTAC-a bildiriblər ki, belə qəhrəmanlardan biri də Azərbaycan Silahlı Qüvvələrinin zabiti mayor Anatoli Nikolayeviç Davidoviçdir. Yaşasaydı mart ayının 28-də onun 50 yaşı tamam olacaqdı. Lakin A.Davidoviç gəncliyinin ən gözəl çağında - 27 yaşında Azərbaycan Respublikasının suverenliyi və ərazi bütövlüyünün qorunması, dinc əhalinin təhlükəsizliyinin təmin edilməsi uğrunda gedən döyüşlərdə əbədi olaraq şəhidlik zirvəsinə ucalıb.
Müdafiə naziri general-polkovnik Zakir Həsənovun əmrinə əsasən yubiley tədbirlərinin təşkili ilə bağlı Belarusun Slutsk şəhərinə ezam edilmiş nümayəndəmiz əvvəlcə şəhər mərkəzi xəstəxanasına gedərək şəhidin bir ay əvvəl ürəyində açıq cərrahiyyə əməliyyatı aparılmış anası Kima Andreyevna ilə görüşüb, ona xalqımızın, Silahlı Qüvvələrin şəxsi heyətinin minnətdarlıq dolu salamlarını və Müdafiə Nazirliyinin yubiley töhfəsini çatdırib.
“Dədə Qorqud” Milli Fondunun və “Azərbaycan Dünyası” beynəlxalq jurnalının redaksiya heyətinin təsis etdiyi “Mehriban ana” medalının oğlunun yubiley günündə anaya təqdim olunması onda xoş duyğular oyadıb.
K.Andreyevna növbəti dəfə diqqətdən kənarda qalmadığı, övladının unudulmadığı və xatirəsinin əziz tutulduğu üçün bir daha Azərbaycan xalqına minnətdarlığını bildirib.
Martın 28-də Müdafiə Nazirliyinin bilavasitə təşkilatçılığı ilə Milli Qəhrəmanın 50 illik yubileyi yüksək səviyyədə qeyd edilib.
Əvvəlcə tədbir iştirakçıları şəhər qəbiristanlığına gedərək qəhrəmanın məzarını ziyarət edib, üzərinə gül dəstələri qoyublar.
Anım mərasimini açan polkovnik Abdulla Qurbani qəhrəmanın keçdiyi qısa, lakin mənalı ömür yolundan danışaraq bildirib ki, A.Davidoviç 50 il əvvəl Minsk vilayətinin Kopolskiy rayonunun Skobin kəndində anadan olub. Sonra ailələri ilə birlikdə Slutsk şəhərinə köçən Anatoli burada S.F.Rubanov adına orta məktəbi bitirib, Ukraynadakı Sumı Ali Artilleriya Məktəbində təhsil alıb, SSRİ-nin Almaniyadakı Qoşun Qrupunda tağım komandiri kimi xidmətə başlayıb.
1989-cu ildə Zaqafqaziya Hərbi Dairəsinə - Gəncə şəhərinə göndərilmiş gənc zabit burada artilleriya hərbi hissələrindən birində xidmətini davam etdirib. Xocalı faciəsindən sonra isə könüllü olaraq Azərbaycan Silahlı Qüvvələrinə daxil olub.
Azərbaycan Respublikası müdafiə nazirinin əmri ilə ona “mayor” hərbi rütbəsi verilib, artilleriya hissələrindən birinə qərargah rəisi təyin edilib. Milli artilleriyaçı kadrların hazırlanmasında səylərini əsirgəməyən mayor A.Davidoviç tabeliyindəki şəxsi heyətlə birlikdə mütəmadi olaraq Tərtər, Ağdam, Goranboy və Füzuli bölgələrində döyüş tapşırıqlarını yerinə yetirib.
1992-ci ilin iyununda Ağdam bölgəsində qanlı döyüşlər gedərkən o, xüsusi qəhrəmanlıq nümunələri göstərərək düşmənə texnika və canlı qüvvə sarıdan xeyli itkilər verilməsinə nail olub. Lakin döyüş tapşırığını yerinə yetirərkən ağır yaralanmış mayor A.Davidoviçə vaxtında ilk yardım göstərilməsinə, helikopterlə Bakıya hərbi hospitala çatdırılmasına və həkimlərin səylərinə baxmayaraq, onu ölümün pəncəsindən xilas etmək mümkün olmayıb.
Ölümündən az sonra, 1992-ci il iyulun 3-də Belarus Respublikasının müstəqilliyi günündə mayor A.Davidoviçə “Azərbaycanın Milli Qəhrəmanı” fəxri adı verilib.
Slutsk şəhər İcraiyyə Komitəsi sədrinin müavini Larisa Georgiyevna Dobrovolskaya anım mərasimində çıxış edərək Azərbaycan və Belarus xalqlarının dostluq və qardaşlıq münasibətlərinin daha da genişləndiyindən söhbət açıb, azərbaycanlıların da Böyük Vətən müharibəsi illərində Belarusun faşist işğalçılarından azad edilməsində müstəsna xidmətlərini qeyd edib, görkəmli sərkərdələrimizin, azərbaycanlı Sovet İttifaqı qəhrəmanlarının adlarını iftixar hissi ilə çəkib və bildirib ki, Azərbaycan xalqı Belarusdan olan qəhrəmanını unutmadığı kimi, belaruslular da bu torpaqlar uğrunda həlak olan yüzlərlə azərbaycanlı döyüşçünün xatirəsini həmişə əziz tuturlar.
Uzun illərdir ki, Belarus Respublikasında yaşayan azərbaycanlı ziyalılar - Belarus Azərbaycan İcmaları Konqresinin fəalları İlham Hacıyev, Mirəli Mirəliyev, Elman Mahmudov, Zaur Tərlanov çıxışlarında şəhidin ailəsi ilə daim əlaqə saxladıqlarını, onların problemlərinin həlli istiqamətində həmişə yardımçı olduqlarını vurğulayıblar.
Milli Qəhrəmanın qardaşı Aleksandr ay yarım Azərbaycanda, Ağdam uğrunda döyüşlərdə Anatoliy Davidoviçlə bir səngərdə olduğunu söyləyib, hər cür təcavüzə, işğala, terrora nifrət etdiyini bildirib.
Həkimlərin ciddi nəzarətinə baxmayaraq mərkəzi xəstəxanadan çıxaraq birbaşa anım mərasiminə gəlmiş şəhid anası Kima Andreyevna Azərbaycan rəhbərliyinə, xalqına, tədbirin təşkilatçılarına oğlunun 50 illik yubileyini yüksək səviyyədə keçirdiklərinə görə bir daha dərin təşəkkürünü bildirib.
Azərbaycan Respublikası Müdafiə Nazirliyinin təşkilatçılığı ilə keçirilən tədbirdə Milli Qəhrəman anasının 1994-cü ildə ulu öndərimiz Heydər Əliyevlə görüşdüyü barədə xatirələri iştirakçılar tərəfindən maraqla qarşılanıb. Bildirilib ki, bu yaxınlarda Gəncə Şəhər İcra Hakimiyyəti başçısının sərəncamı ilə şəhərin mərkəzi küçələrindən birinə mayor A.Davidoviçin adı verilib. Bir neçə gündən sonra həmin küçənin başlanğıcındakı binaya qəhrəmanın barelyefi vurulacaq, küçənin təntənəli açılışı olacaq, Milli Qəhrəmanın 4 il yaşadığı və xidmət etdiyi Gəncə şəhərində yubiley mərasimi keçiriləcək. Həmin yubiley tədbirinə dəvəti A.Davidoviçlər ailəsi onlara göstərilən diqqət və qayğının daha bir təzahürü kimi qiymətləndiriblər.
Həmin gün Azərbaycanın Milli Qəhrəmanı mayor A.Davidoviçin vətənində “Belarus oğlu, Azərbaycan qəhrəmanı” sənədli filminin son kadrları çəkilib və müsahibələr alınıb.
Bölmənin digər xəbərləri
