Minsk, 10 dekabr, AZƏRTAC

Azərbaycanın Belarusdakı səfirliyində ümummilli lider Heydər Əliyevin xatirəsinə həsr olunmuş anım tədbiri keçirilib.

AZƏRTAC xəbər verir ki, əvvəlcə Ulu Öndərin büstü önünə əklil və gül dəstələri qoyulub, dahi rəhbərin xatirəsi bir dəqiqəlik sükutla yad edilib.

Sonra səfir Ülvi Baxşəliyev çıxış edərək, müasir, müstəqil Azərbaycan dövlətinin memarı, xalqımızın xilaskarı, dahi şəxsiyyət və siyasətçi ulu öndər Heydər Əliyevin millətinə, dövlətinə sevgi və sədaqəti, qətiyyəti, müdrikliyi və ali liderlik bacarığı barədə iştirakçılara ətraflı məlumat verib. Səfir çıxışında Ümummilli Liderimizin Azərbaycanı parçalanmaqdan xilas etməsinə, milli-mənəvi irsimizə, dəyərlərimizə, milli adət-ənənələrimizə böyük dəyər verməsinə diqqət çəkib. Bildirib ki, ölkəmizdə 1993-cü ilin iyun ayında baş verən hadisələr dövlətçiliyimizi və müstəqilliyimizi böyük təhlükə altına almış, Azərbaycan bir dövlət kimi parçalanıb, məhv olmaq təhlükəsi ilə üzləşmişdi. Belə bir çətin vəziyyətdən xalqımız öz nicatını yalnız və yalnız dahi Heydər Əliyevdə görürdü. Ona görə də xalq ayağa qalxdı, böyük təkidlə Heydər Əliyevi ölkə rəhbərliyinə dəvət etdi. Öz xalqının taleyinə heç vaxt biganə qalmayan Ulu Öndər 1993-cü ildə Bakıya gəldi, Azərbaycanı vətəndaş müharibəsi və parçalanmaq təhlükəsindən xilas etdi. Azərbaycanda sabitlik bərqərar oldu və ölkəmiz yeni inkişaf yoluna qədəm qoydu.

Səfir bildirib ki, Ulu Öndərimiz xaricdə yaşayan azərbaycanlıların birliyi və təşkilatlanması məsələsini daim diqqət mərkəzində saxlayıb, Azərbaycan diaspor cəmiyyətlərinin problem və qayğılarına böyük həssaslıqla yanaşıb. Azərbaycan icmaları, cəmiyyət və birliklərinin fəaliyyətinin gücləndirilməsi və əlaqələndirilməsi məqsədilə Heydər Əliyevin sərəncamına əsasən 2001-ci il noyabrın 9-10-da Bakıda keçirilmiş Dünya Azərbaycanlılarının I qurultayı soydaşlarımızın azərbaycançılıq ideyası ətrafında sıx birləşməklə təşkilatlanması baxımından tarixi əhəmiyyət kəsb edib. Bu addım diaspor hərəkatının inkişafında yeni mərhələnin başlanğıcını qoyub. Ümummilli Lider bu sahədə sistemli dövlət siyasətinin həyata keçirilməsini təmin etmək məqsədilə 2002-ci ildə Xarici ölkələrdə Yaşayan Azərbaycanlılarla İş üzrə Dövlət Komitəsinin yaradılması barədə Fərman imzalayıb. 31 Dekabr - Dünya Azərbaycanlılarının Həmrəylik Gününün müəllifi də Heydər Əliyevdir.

Ü.Baxşəliyev ölkəmizin işğal altında olmuş ərazilərinin 44 günlük Vətən müharibəsində Ali Baş Komandan İlham Əliyevin müdrik rəhbərliyi, Azərbaycan Ordusunun şücaəti nəticəsində azad olunmasından və qazanılan Şanlı Qələbədən danışaraq, bu qələbənin əsasının Heydər Əliyevin ikinci dəfə hakimiyyətə qayıdışından sonra qoyulmasına, xüsusilə nizami və güclü ordu quruculuğuna, iqtisadi nailiyyətlərə, Azərbaycanın beynəlxalq aləmdə yüksəlmiş nüfuzuna diqqət çəkib.

Səfir vurğulayıb ki, ulu öndər Heydər Əliyevin Azərbaycan xalqı qarşısında ən böyük xidmətlərindən biri də özündən sonra onun müəyyənləşdirdiyi siyasi-iqtisadi inkişaf kursu uğurla davam etdirə bilən İlham Əliyev kimi siyasi varis yetişdirməsidir. Bu gün Azərbaycan Prezidenti bu ümidləri layiqincə doğruldaraq, dahi öndərin ideyalarını inamla həyata keçirir. Ümummilli lider Heydər Əliyevin xalqımız qarşısında misilsiz xidmətləri unudulmur və böyük minnətdarlıq hissi ilə yad edilir. Heydər Əliyevin xatirəsi bundan sonra da qəlblərdə əbədi yaşayacaq.

Sonra azərbaycanlıların Minskdə fəaliyyət göstərən “Qobustan” cəmiyyətinin sədri Baxış Qəmbərov çıxış edərək, Ulu Öndərin diaspor quruculuğuna verdiyi önəm və diqqətdən, həmçinin xalqımız qarşısında xidmətlərindən danışıb.

Daha sonra Heydər Əliyevin həyat və fəaliyyəti barədə film nümayiş etdirilib.

Sonda tədbir iştirakçıları ehsan süfrəsinə dəvət olunub.

Emil Hüseynli

AZƏRTAC-ın xüsusi müxbiri

Minsk