Benilüks Azərbaycanlıları Konqresinin Brüsseldəki yeni ofisində görüş keçirilmişdir
Bakı, 2 iyun (AZƏRTAC). Diasporla İş üzrə Dövlət Komitəsinin Belçikada səfərdə olan nümayəndə heyəti və bir neçə media qurumunun təmsilçisi Benilüks Azərbaycanlıları Konqresinin Brüsseldəki yeni ofisində görüş keçirmişdir.
Diasporla İş Üzrə Dövlət Komitəsindən AZƏRTAC-a verilən məlumata görə, Benilüks Azərbaycanlıları Konqresinin (BAK) sədri Sahil Qasımov əvvəlcə təşkilatın Brüsseldə açılmış yeni ofisi haqqında məlumat vermişdir. O demişdir ki, təşkilatın yeni qərargahı üçün Avropa İttifaqının mərkəzi şəhərinin seçilməsi təsadüfi deyildir. BAK Avropa İttifaqına daxil olan institutlar, Avropa Parlamentinin yeni deputatları ilə əməkdaşlığı intensivləşdirməyi, lobbiçilik fəaliyyətini gücləndirməyi qarşıya məqsəd qoymuşdur. S.Qasımov, həmçinin diqqətə çatdırmışdır ki, Brüsselin mərkəzində - hər gün minlərlə turistin keçdiyi tarixi Qran Plas meydanı yaxınlığında ofis açmaq və orada Azərbaycan bayrağını dalğalandırmaq da ölkənin təbliğinə hesablanmışdır.
Diasporla İş üzrə Dövlət Komitəsinin Aparat rəhbəri Nəriman Qurbanov BAK-ın Avropa İttifaqının mərkəzində ofis açmasının təqdirəlayiq olduğunu bildirmişdir. Onun sözlərinə görə, təşkilatın Brüsseldə də qərargahının olması onun beynəlxalq əlaqələrinin gücləndirilməsinə təkan verəcək və qurumun lobbiçilik istiqamətində yürütdüyü siyasətin daha səmərəli olmasını təmin edəcəkdir.
Görüşdə Konqresin təşkilatlanma, diaspor, lobbiçilik fəaliyyətində görülmüş işlər, qarşıya qoyulmuş məqsədlər və planlar, Benilüks ölkələrində fəaliyyət göstərən diaspor təşkilatlarının problemləri müzakirə edilmişdir. Bildirilmişdir ki, diaspor təşkilatları arasında sağlam rəqabət aparmağın və fəal lobbiçilik siyasətinə başlamağın vaxtı çatmışdır.
Diasporla İş Üzrə Dövlət Komitəsinin şöbə müdiri İlham Məmmədov Benilüks ölkələrindəki Azərbaycan diaspor təşkilatları arasında əməkdaşlığı daha da gücləndirməyin zəruriliyini vurğulamışdır. O qeyd etmişdir ki, hazırda Azərbaycan diasporunun qarşısında duran bir sıra vəzifələrin həyata keçirilməsi müxtəlif diaspor təşkilatları arasındakı koordinasiya və əlaqələrin möhkəmləndirilməsi ilə sıx bağlıdır.
S.Qasımov Hollandiyada həyata keçirdiyi təşkilatlanma modelini Belçikada da tətbiq etməyi planlaşdırdığını söyləmiş, BAK-ın siyasi təşkilat kimi fəaliyyətini gücləndirməyin də önəmini qeyd etmişdir. Qurumun rəhbərliyi bu günlərdə BMT-nin Avropa ofisində qeydiyyatdan keçmək üçün müraciət etməyi planlaşdırır.
Müzakirələr zamanı mübarizəni akademik səviyyəyə keçirməyin, Azərbaycanın problemlərinin Avropa Parlamenti, Avropa Komissiyası kimi qurumlarda səsləndirməyin vacibliyi vurğulanmışdır. Təklif olunmuşdur ki, həmin institutlarda Azərbaycana dair məsələlərin müzakirəsinə, ölkəmiz haqqında obyektiv qərarların qəbul olunmasına nail olmaq üçün Azərbaycanın dostları qrupu yaradılsın və onlara dövlət səviyyəsində hər cür maddi, mənəvi dəstək göstərilsin.
Daha sonra Azərbaycan həqiqətlərinin Avropada yayılması üçün yeni yollar və mexanizmlərin tapılması, 2015-ci ildə qondarma erməni soyqırımı ilə əlaqədar erməni diasporunun fəallaşmasının qarşısını almaq üçün Azərbaycan və türk diaspor təşkilatları arasında əlaqələndirmənin və Benilüks ölkələrində, eləcə də Avropa Parlamentində türk mənşəli deputatlar ilə əməkdaşlığın gücləndirilməsinin vacibliyi vurğulanmışdır. Bundan başqa, gələn il Bakıda keçiriləcək I Avropa Oyunları zamanı Azərbaycana qarşı gözlənilən əks-təbliğatın qarşısının alınmasında Benilüks Azərbaycanlıları Konqresinə daxil olan təşkilatların görəcəyi işlər, eləcə də Konqresin müasir informasiya texnologiyaları ilə təmin olunması kimi məsələlər də müzakirə edilmişdir.
Bölmənin digər xəbərləri
