REGİONLAR
BEŞ MİN 800 BAŞ SAĞLAM CİNS BUZOV ALINMIŞDIR
İsmayıllı Aqrobiznes Məsləhət Şirkətinin vasitəçiliyi və yardımı ilə 15 nəfər yerli zoobaytar mütəxəssis Hollandiyadan gəlmiş mütəxəssislərdən heyvanların rektosevkal üsulla süni mayalandırılması kursunu müvəffəqiyyətlə mənimsəmişlər. Artıq yerli mütəxəssislər İsmayıllı və Göyçay bölgələrində fermerlərə, ümumiyyətlə, sahibkarlara məxsus mal-qaranın yeni üsulla süni mayalandırılmasını həyata keçirirlər.
Şirkətin direktoru Elşən İsmayılov AZƏRTAC-ın müxbirinə bildirmişdir ki, İsmayıllı və Göyçay bölgələrində heyvanların süni mayalandırılması işləri 3 ildir aparılır. İlk vaxtlar bu tədbir hollandiyalı mütəxəssisin iştirakı ilə yerinə yetirilirdi. Hazırda isə yerli mütəxəssislər sərbəst surətdə həmin işin öhdəsindən gəlirlər. İndiyədək süni mayalandırılmış heyvanlardan 5 min 800 baş sağlam cins buzov alınmışdır.
Mayalandırmada Hollandiyadan gətirilən cins buğa toxumlarından istifadə olunur. Uğurlu nəticələri görən sahibkarlar bu məqsədlə Aqrobiznes Məsləhət Şirkətinə daha tez-tez müraciət edirlər.