BEYNƏLXALQ ELMİ İNKİŞAF ŞURASININ – BEYNƏLXALQ ELMLƏR AKADEMİYASI AZƏRBAYCAN BÖLMƏSİNİN TƏSİSÇİLƏRİNƏ
Hörmətli təsisçilər!
Təsis yığıncağının görkəmli iştirakçıları!
Bu bölmənin yaradılmasının təşəbbüskarlarını - professor, akademik Cəlal Əliyevi, professor Elçin Xəlilovu, professor, akademik Mahmud Kərimovu və professor Arif Məmmədovu ayrıca salamlayıram!
Beynəlxalq Elmi İnkişaf Şurasının - Beynəlxalq Elmlər Akademiyası (BEİŞ/BEA) Azərbaycan bölməsinin təsis mərasiminin iştirakçılarına səmimi salamımı göndərməkdən böyük şərəf və məmnunluq duyuram. Çox təəssüflənirəm ki, belə unudulmaz tədbirə dəvətinizi şəxsən qəbul edib gələ bilmədim. Ona görə də Beynəlxalq Elmlər Akademiyasının prezidenti professor Valter Kofler mənim salamımı Sizə yetirir.
BEİŞ/BEA-nın fəxri prezidenti və Avropa Şurasının sabiq baş katibi kimi, mən Beynəlxalq Elmi İnkişaf Şurasının - Beynəlxalq Elmlər Akademiyasının ailəsində Azərbaycanı xüsusi maraqla salamlayır və bunu vurğulamağa şadam ki, Avropa Şurası 2001-ci ildə ölkənizi mehribanlıqla Avropa ölkələri ailəsinə qəbul edə bilmişdir. Azərbaycan Avropanın cənub-şərqində yerləşir və Avropanın layiqincə qiymətləndirilməmiş, amma çox mühüm mədəni regionudur. Ona görə də hesab edirik ki, Azərbaycan bölməsi Avropada ehtiyacların və dəyərlərin müxtəlifliyini daha yaxşı başa düşmək üçün yeni aspektlər və yeni ideyalar irəli sürəcəkdir.
Tanınmış alim - professor, akademik Cəlal Əliyev ilə birlikdə BEA-nın Azərbaycan bölməsinin fəxri prezidenti olaraq, fəaliyyət göstərmək ücün dəvət olunmaq məndən ötrü xüsusi şərəfdir. Mən sizin təklifinizi böyük məmnuniyyətlə qəbul edirəm və dünyada sabit gələcək, ölkənizin xalqının firavanlığı naminə fəaliyyətinizi imkanım daxilində dəstəkləyəcəyəm.
Təəssüflənirəm ki, Beynəlxalq Elmi İnkişaf Şurasının - Beynəlxalq Elmlər Akademiyasının “Pavlov Pin” qızıl nişanı ilə təltif olunmuş üç tanınmış alimi şəxsən təbrik edə bilmirəm. Xahiş edirəm, BEİŞ/BEA Azərbaycan bölməsinin fəxri prezidenti, professor Cəlal Əliyevə, Azərbaycan Milli Elmlər Akademiyasının prezidenti, professor Mahmud Kərimova və Azərbaycan Respublikası parlamentinin elm və təhsil məsələləri daimi komissiyasının sədri, professor Şahlar Əsgərova xüsusi təbriklərimi yetirəsiniz.
Biz bilirik ki, Avropada problemlər çoxdur. Lakin biz əməkdaşlıq etsək və mədəni müxtəlifliyin müsbət dəyər olduğunu qəbul etsək, onda bu problemlər həll oluna bilər. Müxtəlif ölkələrin bir çox mötəbər elmi təşkilatlarının Azərbaycan bölməsi və dünyanın hər yerində BEİŞ/BEA ilə əməkdaşlıq etmək istəməsi faktı ümid doğurur.
Sizə ən xoş arzularımı bildirirəm.
Corc Kann-Akkerman
Avropa Şurasının sabiq baş katibi,
Beynəlxalq Elmi İnkişaf Şurasının -
Beynəlxalq Elmlər Akademiyasının
fəxri prezidenti
Bölmənin digər xəbərləri
