Beynəlxalq Əmək Təşkilatı: İş dünyası sürətli və qeyri-sabit dəyişikliklərə məruz qalır
Bakı, 3 noyabr, AZƏRTAC
İş dünyası sürətli və qeyri-sabit dəyişikliklərə məruz qalır, bərabərsizliyin artması, həmçinin iş təhlükəsizliyinin olmaması milyonlarla insanı sabit dolanışıq və ya əsas müdafiə vasitələrindən məhrum edir.
AZƏRTAC xəbər verir ki, bu fikirlər BMT-nin Beynəlxalq Əmək Təşkilatı (BƏT) tərəfindən dərc edilmiş yeni hesabatda yer alıb. Təşkilat hökumətləri, işəgötürənləri və əmək təşkilatlarını ləyaqəti, işçi hüquqlarını iqtisadi qərar qəbuletmənin mərkəzinə qoymağa çağırır.
BƏT-in İşçi Fəaliyyətləri Bürosunun direktoru Maria Helena Andre bildirib: “Bu hesabat dünya üzrə həmkarlar ittifaqlarının səslərini, təcrübələrini və təkliflərini bir araya gətirir. İşçilər sosial ədalətin təşviqi və daha inklüziv iş gələcəyinin formalaşdırılması üçün ortaq prioritetlər müəyyən ediblər”.
O qeyd edib ki, iqtisadiyyatlar və əmək bazarları sürətlə dəyişsə də, işçilərin müdafiəsi və idarəetmə sistemləri bu tempə uyğunlaşmayıb, bu isə təhlükələrin artmasına və bərabərsizliklərin dərinləşməsinə səbəb olub.
Hesabata görə, texnoloji dəyişiklik, iqlim təzyiqləri, demoqrafik dəyişikliklər və zəifləmiş sosial müdafiə iş yerlərini siyasətin uyğunlaşa biləcəyindən daha sürətli şəkildə yenidən formalaşdırır. BƏT xəbərdarlıq edir ki, müvafiq tədbirlər görülməsə, mövcud bərabərsizliklərin, xüsusən də qeyri-rəsmi, müvəqqəti və ya aşağı əməkhaqqı olan işlərdə çalışan işçilər üçün daha da pisləşməsi ehtimalı var.
Hesabatda vurğulanır ki, layiqli iş və əmək hüquqları müzakirə mövzusu deyil, həmçinin iqtisadi idarəetmədə insan amili birinci yerə qoyulmalı, texnoloji, iqlim dəyişiklikləri ədalətli və inklüziv olmalıdır. BƏT qeyd edir ki, yerli reallıqlar fərdiləşdirilmiş həllər tələb edir, bu kontekstdə həmkarlar ittifaqları aktuallığını qorumaq üçün transformasiya mərhələsinə qədəm qoyub.
Hesabat noyabrın 4-6-da Qətərin paytaxtı Dohada keçiriləcək qlobal sosial inkişaf sammiti ərəfəsində dərc olunub.
Bölmənin digər xəbərləri
