BEYNƏLXALQ İCTİMAİYYƏT AZƏRBAYCANIN ƏDALƏTLİ MÖVQEYİNİ DƏSTƏKLƏYİR

21.09.2004 [22:23]
Çap et
A⁺ A^-

Azərbaycan Respublikasının xarici işlər naziri Elmar Məmmədyarov respublikamıza səfərə gələn ATƏT-in fəaliyyətdə olan sədrinin Azərbaycan və Ermənistan üzrə xüsusi elçisi Filipp Dimitrov, Bolqarıstan Xarici İşlər Nazirliyinin Qafqaz məsələləri üzrə məsul nümayəndəsi Dimiter Dimitrov və ATƏT-in fəaliyyətdə olan sədrinin xüsusi nümayəndəsi Anji Kaspşik ilə görüşmüşdür.

Xarici İşlər Nazirliyinin mətbuat mərkəzindən AZƏRTAC-a bildirmişlər ki, ATƏT-in fəaliyyətdə olan sədri Solomon Passinin salamlarını çatdıran qonaq Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində müəyyən irəliləyişlərin əldə olunması üçün kömək göstəriləcəyinə əminliyini bildirmişdir.

Qonaqları səmimi salamlayan xarici işlər naziri Elmar Məmmədyarov Filipp Dimitrovun ölkəmizə səfərinin əhəmiyyətini diqqətə çatdırmışdır. Ermənistan-Azərbaycan, Dağlıq Qarabağ münaqişəsinin həlli ilə bağlı Praqada aparılan danışıqları məqbul qiymətləndirən nazir, Azərbaycan və Ermənistan prezidentlərinin Astanada keçirdikləri görüşdən sonra danışıqlar prosesinin sürətləndirilməsinin vacibliyini xüsusi qeyd etmişdir. Xarici siyasət idarəsinin başçısı münaqişənin beynəlxalq hüququn norma və prinsipləri əsasında həllinə dair yalnız yerli deyil, beynəlxalq ictimaiyyətin də mövqeyinin müsbət təsir göstərəcəyinə inandığını söyləmişdir.

Görüşdə qarşılıqlı maraq doğuran bir sıra məsələlər də müzakirə olunmuşdur.