Beynəlxalq Miqrasiya İcmalı Forumu çərçivəsində keçirilən dəyirmi masaya həmsədrlik ölkəmizə həvalə edilib
Bakı, 6 may, AZƏRTAC
Birləşmiş Millətlər Təşkilatının (BMT) Nyu-Yorkdakı Baş Qərargahında ikinci Beynəlxalq Miqrasiya İcmalı Forumu öz işinə başlayıb. Forumda Dövlət Miqrasiya Xidmətinin rəisi Vüsal Hüseynovun rəhbərlik etdiyi nümayəndə heyəti iştirak edir. Heyətin tərkibində ölkəmizin BMT yanında daimi nümayəndəsi Tofiq Musayev başda olmaqla daimi nümayəndəliyin əməkdaşları da yer alıb.
Dövlət Miqrasiya Xidmətindən AZƏRTAC-a bildirilib ki, Beynəlxalq Miqrasiya İcmalı Forumu dörd ildən bir təşkil olunan miqrasiya sahəsində əsas qlobal tədbirdir. Bu hökumətlərarası platformanın məqsədi “Təhlükəsiz, nizamlı və qanuni miqrasiya üzrə Qlobal Pakt”ın (Miqrasiya üzrə Qlobal Pakt) icrasına nəzər salmaq, nailiyyətləri və mövcud boşluqları müzakirə etməkdir. Forum, həmçinin növbəti dörd il üçün miqrasiya idarəçiliyinin perspektivlərini müəyyənləşdirir. Tədbirdə hökumətlər, beynəlxalq təşkilatlar, vətəndaş cəmiyyəti və digər tərəflər qlobal miqrasiya proseslərinin daha səmərəli və inklüziv idarəolunmasına dair fikir mübadiləsi aparır.
Ölkəmizin miqrasiya sahəsində müxtəlif səviyyələrdə həyata keçirdiyi fəaliyyətin nəticəsi olaraq, bu dəfə Azərbaycan 2026-cı il üçün Miqrasiya üzrə Qlobal Paktın icrası üzrə “Çempion ölkələr” təşəbbüsünün həmsədri qismində sözügedən təşəbbüsə qoşulmuş dövlətlər adından birgə bəyanat təqdim edəcək, milli bəyanatla çıxış edəcək.
Forumun ilk günündə Miqrasiya üzrə Qlobal Paktın məqsədlərinə münasibətdə icra vəziyyətinin müzakirəsi üçün əsas platforma olan dörd dəyirmi masadan birinə həmsədrlik BMT Baş assambleyasının prezidenti tərəfindən Azərbaycana həvalə edilib. Dəyirmi masalara ümumilikdə 8 ölkə həmsədrlik edir.
Azərbaycanın İsveç Krallığı ilə birgə həmsədrlik etdiyi 1-ci dəyirmi masa Miqrasiya üzrə Qlobal Paktın miqrasiyaya səbəb olan mənfi amillərin azaldılması, tənzimlənən miqrasiya yollarının əlçatanlığının artırılması, ədalətli işə qəbul, ilkin yoxlanış və istiqamətləndirmə prosedurları, bacarıqların inkişafı və qarşılıqlı tanınması ilə bağlı olan məqsədlərinin icrasına həsr olunub.
Birinci dəyirmi masada müxtəlif ölkələrdən və beynəlxalq təşkilatlardan nümayəndələr panel məruzəçi qismində Miqrasiya üzrə Qlobal Paktın məqsədləri barədə fikir mübadiləsi aparıb və iştirakçıların suallarını cavablandırıblar.
Dəyirmi masaların yekununda Beynəlxalq Miqrasiya Təşkilatının sədrliyi ilə keçiriləcək siyasi dialoq çərçivəsində birinci dəyirmi masanın xülasəsi Dövlət Miqrasiya Xidmətinin rəisi Vüsal Hüseynov tərəfindən təqdim olunacaq.
Qeyd edək ki, Bakıda keçiriləcək Ümumdünya Şəhərsalma Forumunun qlobal təşviqinə dəstək məqsədilə Azərbaycan, Beynəlxalq Miqrasiya Təşkilatı və BMT-nin Məskunlaşma Proqramının birgə təşkilatçılığı ilə BMT Baş Qərargahında miqrasiya və urbanizasiya mövzularına həsr olunmuş yüksəksəviyyəli əlavə tədbir keçiriləcək.
Forum öz işini mayın 8-də yekunlaşdıracaq.
Bölmənin digər xəbərləri
