Bəzi Körfəz ölkələrində karantin rejimi sərtləşdirilə bilər
Qahirə, 21 avqust, AZƏRTAC
Körfəz Dövlətləri Şurasının iki böyük ölkəsi - Birləşmiş Ərəb Əmirlikləri (BƏƏ) və Səudiyyə Ərəbistanında COVID-19-a yoluxanların sayında artım müşahidə olunur.
AZƏRTAC xəbər verir ki, BƏƏ-nin Səhiyyə Nazirliyi ölkədə yenidən gecə karantininin tətbiq edilə biləcəyini bəyan edib. Əmirliklərdə son ay ərzində ilk dəfə bir gündə yoluxanların sayı 400-ü keçib və daha 2 pasiyent vəfat edib. BƏƏ-nin Milli Fövqəladə Böhran və Fəlakətlərin İdarəedilməsi Departamentinin sözçüsü Seyif Əl-Zəhri qeyd edib ki, karantin rejiminin yumşaldılması iqtisadiyyata faydalı olsa da, yeni növ koronavirusun yenidən sürətlə yayılmasına şərait yaradıb.
BƏƏ-nin Səhiyyə Nazirliyinin son məlumatına görə, bu ölkədə COVID-19-a yoluxanların ümumi sayı 66 minə yaxındır, 359 pasiyent isə dünyasını dəyişib.
Səudiyyə Ərəbistanında isə son sutka ərzində COVID-19-a 1287 yoluxma qeydə alınıb və daha 42 pasiyent vəfat edib. Bu ölkədə yeni növ koronavirusa yoluxanların ümumi sayı 304 minə çatıb, 3548 pasiyent vəfat edib. Məhdud sayda zəvvarın iştirakı ilə Həcc ziyarətini həyata keçirən Krallıqda yoluxma halları artmaqda davam edir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
