Bəzi qüvvələr Gürcüstanın strateji tərəfdaşları ilə münasibətlərinə xələl gətirməyə çalışır
Tbilisi, 20 oktyabr, AZƏRTAC
Son illər ərzində Gürcüstanın strateji tərəfdaşları və müttəfiqləri ilə münasibətlərinə xələl gətirmək cəhdləri olub. Bundan əlavə, müəyyən qrupların son bir ildə Ukraynada gedən hərbi əməliyyatlardan öz siyasi məqsədləri üçün istifadə etmək üçün aktiv cəhdləri qeydə alınıb.
AZƏRTAC xəbər verir ki, bunu Gürcüstan Dövlət Təhlükəsizlik Xidmətinin (DTX) rəhbəri Qriqol Liluaşvili qurumun 2022-ci ildəki fəaliyyəti ilə bağlı parlamentdəki çıxışı zamanı bildirib.
Onun sözlərinə görə, 2022-ci ildə Gürcüstana qarşı yönəlmiş hibrid müharibə təhdidləri ölkənin milli təhlükəsizliyinə ciddi problem yaradıb.
DTX rəhbəri deyib ki, keçən il dezinformasiya və təbliğat kampaniyalarına həm xarici, həm də daxili aktorlar qoşulub, onların məqsədi yenidən xarici siyasətə təsir etmək, həmçinin Gürcüstanın strateji tərəfdaşları və müttəfiqləri ilə münasibətlərinə xələl gətirmək olub.
Qriqol Liluaşvili vurğulayıb ki, Dövlət Təhlükəsizliyi Xidmətinə və bütövlükdə təhlükəsizlik sistemlərinə qarşı yayılan dezinformasiya xarakterli bəyanatlar faktiki olaraq ölkədə təhlükəsiz mühitə zərər vurmağa yönəlib və oxşar proseslər bu gün də davam edir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
