Biləsuvarda modul tipli məktəb istifadəyə verilib
Biləsuvar, 15 sentyabr, İlkin Adıyev, AZƏRTAC
“Azərbaycan Respublikasının ərazisində modul tipli təhsil müəssisələrinin quraşdırılması işlərinin davam etdirilməsi haqqında” Azərbaycan Respublikası Prezidentinin 16 may 2022-ci il tarixli Sərəncamı ilə Biləsuvar rayonunun Amankənd kəndində inşa olunan məktəbin açılış mərasimi keçirilib.
AZƏRTAC-ın bölgə müxbiri xəbər verir ki, açılış tədbirində çıxış edən Biləsuvar Rayon İcra Hakimiyyətinin başçısı Faiq Qürbətov Bilik Günü və yeni məktəbin açılışı münasibətilə pedaqoji kollektivi, şagird və valideynləri təbrik edib, onlara yeni dərs ilində uğurlar arzulayıb.
Bildirib ki, Prezident İlham Əliyevin rəhbərliyi ilə bu gün Azərbaycanda təhsilə qayğı ən yüksək səviyyədədir. Bu sahədə həyata keçirilən islahatlar, baş verən hər bir hadisə ilk növbədə Azərbaycanın xoşbəxt gələcəyinə hesablanıb. Bu istiqamətdə Biləsuvarda da təhsilin inkişafı sahəsində layihələr icra olunur, dövlət proqramları həyata keçirilir, müasir tələblər səviyyəsində və yüksək standartlara cavab verən yeni-yeni təhsil müəssisələri tikilir və təmir olunur. İnanırıq ki, bu məktəblərdə dərs deyən müəllimlər və valideynlər də görülən işlərə öz töhfələrini verərək daha savadlı və vətənpərvər gənclər yetişdirəcəklər.
Açılış mərasimində çıxış edən Milli Məclisin deputatı Bəhruz Məhərrəmov, Salyan-Şirvan Regional Təhsil idarəsinin müdiri Sənan Mənsimli, YAP Biləsuvar Rayon Təşkilatının sədri Kamil Qurbanlı, Rayon Ağsaqqallar şurasının sədri Akif Kazımov Bilik Günü və yeni tədris ilinin başlanması münasibətilə pedaqoji kollektivi, şagirdləri və valideynləri təbrik ediblər, yeni məktəbdə daha savadlı kadrlar hazırlanması yolunda kollektivə uğurlar arzulayıblar.
Məktəbin kollektivi və valideynlər təhsil sahəsinə göstərilən yüksək dövlət qayğısına görə Prezident İlham Əliyevə, Birinci vitse-prezident Mehriban xanım Əliyevaya minnətdarlıqlarını bildiriblər.
Sonra qonaqlar məktəb binasına baxış keçirib, yaradılan şəraitlə tanış olublar.
Bölmənin digər xəbərləri
