Bakı, 10 iyun, AZƏRTAC

İyunun 10-da Peşə Təhsili üzrə Dövlət Agentliyi, Avropa İttifaqı (Aİ) və BMT-nin İnkişaf Proqramının birgə əməkdaşlığı ilə Dənizkənarı Milli Parkda “Bir peşənin sirri” festivalı keçirilib.

AZƏRTAC xəbər verir ki, festivalda qonaqlara Bakı və müxtəlif regionları təmsil edən peşə təhsil müəssisələrinin turizm, mədəniyyət, sənaye, kənd təsərrüfatı, İKT və ictimai iaşə istiqamətlərində təhsil alan tələbələrinin əl işlərindən ibarət sərgilər, ustad dərsləri və müxtəlif fəaliyyətlər nümayiş etdirilib.

Açılış mərasimində çıxış edən Peşə Təhsili üzrə Dövlət Agentliyinin direktoru vəzifəsini müvəqqəti icra edən Ceyhun Kərimov bildirib ki, festivalda 15-ə yaxın peşə təhsil mərkəzi iştirak edir. Qeyd edib ki, tədbirin keçirilməsində əsas məqsəd peşə təhsilinin əhatə dairəsini daha da genişləndirmək, gənclərin, valideynlərin o cümlədən bütün maraqlı tərəflərin bu prosesə cəlb edilməsini təmin etməkdir.

Elm və təhsil nazirinin müavini İdris İsayev peşə təhsilinin ölkənin inkişafındakı strateji rolundan, gənclərin məşğulluğunun və peşə təhsilinə olan marağın artırılması istiqamətində görülən işlərdən söz açıb.

Milli Məclisin deputatı Vüqar Bayramov qeyd edib ki, peşə təhsilinin inkişafı Azərbaycan üçün prioritet istiqamətlərdən biridir. Peşə təhsilinin genişləndirilməsi, infrastrukturunun yenilənməsi bu sahədə ixtisaslı kadrlara olan ehtiyacı artırır.

Festival çərçivəsində “WorldSkills” Azərbaycan platforması və STEAM Azərbaycan layihəsi çərçivəsində əyləncəli oyunlar, viktorinalar keçirilib. Peşə təhsili müəssisələri tərəfindən keçirilən yarışların qalibləri hədiyyələrlə mükafatlandırılıb. Həmçinin tədbir iştirakçıları müxtəlif peşələrin sirri ilə bağlı maraqlı məlumatlar əldə ediblər.

Qeyd edək ki, “Bir peşənin sirri” festivalına bu il də Aİ tərəfindən maliyyələşdirilən və BMT-nin İnkişaf Proqramı tərəfindən Peşə Təhsili üzrə Dövlət Agentliyi ilə birgə həyata keçirilən “Gələcək üçün peşə təhsili və təlimi: Azərbaycanda qabaqcıl peşə təhsili mərkəzlərinin yaradılmasına dəstək” layihəsi dəstək verir. Tədbirin tərəfdaşı Dənizkənarı Bulvar İdarəsidir.