BİRLƏŞMİŞ ƏRƏB ƏMİRLİKLƏRİ İLƏ AZƏRBAYCAN ARASINDA HAVA ƏLAQƏLƏRİNİN YARADILMASINA DAİR SAZİŞ İMZALANMIŞDIR
Xəbər verildiyi kimi, Azərbaycanın Nəqliyyat Nazirliyinin dəvəti ilə Birləşmiş Ərəb Əmirlikləri Kommunikasiya Nazirliyinin nümayəndə heyəti Bakıya üçgünlük səfərə gəlmişdir. İyulun 8-də Birləşmiş Ərəb Əmirlikləri kommunikasiya naziri Əhməd Humeyd əl-Tayerin başçılıq etdiyi nümayəndə heyəti əvvəlcə Şəhidlər xiyabanını ziyarət etmiş, Əbədi məşəl abidə kompleksinin önünə əklil qoymuşdur. Sonra Azərbaycan Respublikasının Nəqliyyat Nazirliyində Birləşmiş Ərəb Əmirlikləri Kommunikasiya Nazirliyinin nümayəndə heyəti ilə görüş keçirilmişdir. Nəqliyyat naziri Ziya Məmmədov dəvəti qəbul edib Bakıya səfər edən Birləşmiş Ərəb Əmirliklərinin kommunikasiya naziri Əhməd Humeyd əl-Tayerin başçılıq etdiyi nümayəndə heyətinin səfərini yüksək qiymətləndirmişdir. O, iki ölkə arasında hava əlaqələrinin yaradılmasının, beynəlxalq nəqliyyat daşımalarında əməkdaşlığın əhəmiyyətini vurğulamış, qeyd etmişdir ki, Azərbaycan Prezidenti Heydər Əliyevin iqtisadi sahədə uğurlu siyasəti ölkəmizdən uzaqda olan, lakin bir sıra tellərlə bir-birinə bağlı olan Azərbaycanla Birləşmiş Ərəb Əmirliklərinin əməkdaşlığının mohkəmləndirilməsi üçün böyük perspektivlər açır. Cənab Əhməd Humeyd əl-Tayer Azərbaycanın nəqliyyat infrastrukturu ilə əlaqələrin genişləndirilməsinə dair konkret layihələrin nəzərdən keçirilməsinin əhəmiyyətini vurğulamışdır. Səmimi söhbət zamanı digər nəqliyyat sahələrində də əməkdaşlıq imkanları nəzərdən keçirilmişdir. Azərbaycan Respublikasınin Nəqliyyat Nazirliyi ilə Birləşmiş Ərəb Əmirliklərinin Kommunikasiya Nazirliyi arasında hava əlaqələrinin yarardılması barədə hökumətlərarası saziş imzalanmışdır. 22 bənddən ibarət sənədi Azərbaycan tərəfdən nəqliyyat naziri Ziya Məmmədov, Birləşmiş Ərəb Əmirlikləri tərəfdən kommunikasiya naziri Humeyd əl-Tayer imzalamışlar.Hər iki nazir jurnalistləri maraqlandıran suallara cavab vermişlər. ƏHMƏD HUMEYD ƏL-TAYER: AZƏRBAYCANIN RABİTƏ SAHƏSİNDƏ QISA MÜDDƏTDƏ ƏLDƏ ETDİYİ NAİLİYYƏTLƏR MÖCÜZƏ TƏSİRİ BAĞIŞLAYIR Birləşmiş Ərəb Əmirliklərinin kommunikasiya naziri Əhməd Humeyd Əl-Tayer iyulun 9-da respublikamızın Rabitə Nazirliyində işgüzar görüşdə belə demişdir. Qonaqları rabitəçilər adından səmimi salamlayan nazir Nadir Əhmədov Azərbaycanın son illər bu sahədə qazandıgı uğurlardan danışmış və qeyd etmişdir ki, ölkəmiz müstəqillik əldə edənə qədər yalnız 10 kanal vasitəsilə, həm də Moskva vasitəsilə xaricə çıxmaq mümkün idi. Ərəb ölkələri, ABŞ, hətta Türkiyə ilə əlaqə saxlamaq belə müşkül məsələ idi. 1993-cü ildə Prezident Heydər Əliyev yenidən hakimiyyətə qayıtdıqdan sonra ölkəmizdə yaranan sabitlik rabitə sahəsində quruculuq işlərinə başlamaq üçün geniş imkanlar açdı. Məhz Prezidentin qayğısı sayəsində milli rabitə sürətlə inkişaf etməyə başladı. Hazırda dünya ölkələri ilə 1500, o cümlədən 10 dövlətlə birbaşa rabitə kanalımız vardır. İstər paytaxtımız Bakıdan, istərsə də ölkənin ən ucqar bir guşəsindən dünyanın istənilən nöqtəsi ilə rabitə yaratmaq olduqca asandır. Bütün yaşayış məntəqələrimiz telefonlaşdırılmışdır. Azərbaycanda telefon çəkilişi üçün növbəyə dayanmaq zərurəti aradan qalxmışdır. Nazir Nadir Əhmədov telefon stansiyalarında köhnə avadanlığın modernləşdirildiyini, hazırda rabitədə rəqəmli sistemə üstünlük verildiyini bildirərək dedi ki, 2006-cı ildə telefon rabitəsi tamamilə elektronlaşdırılacaqdır. O, həmçinin tədricən fiber-optik kabel sisteminin tətbiq edilməsindən, poçt–rabitə işinin müasir tələblər səviyyəsində qurulmasından, eləcə də mobil telefondan istifadə sahəsində Azərbaycanın MDB ölkələri arasında birinci yerdə olmasından söz açdı. Qonarlara bildirildi ki, Birləşmiş Ərəb Əmirlikləri ilə birbaşa 37 telefon kanalımız vardır. Nadir Əhmədov rabitə sahəsində həllini gözləyən problemlərdən də danışdı. Dedi ki, başçılıq etdiyi sahənin təxminən 20 milyon dollar kreditə ehtiyacı var. Birləşmiş Ərəb Əmirliklərinin bankları ölkəmizə güzəştli kredit ayıra bilərlər. Natiq birgə əməkdaşlığın hər iki ölkənin xalqlarının rifahına xidmət edəcəyini vurğulamışdır. Cənab Əhməd Humeyd Əl-Tayer bu görüşün hər iki ölkənin xalqları üçün faydalı olacağına inandığını bildirmiş, Azərbaycanın ən qısa zamanda əldə etdiyi nailiyyətlərin möcüzə təsiri bağışladığını vurğulamışdır. O, demişdir: Biz tam əminik ki, respublikanızın müdrik rəhbərinin davamlı və məqsədyönlü siyasəti olmasaydı, Azərbaycan bu sahədə belə uğurlar qazana bilməzdi. Mən tam əminəm ki, Zati-aliləri cənab Heydər Əliyevin səyləri nəticəsində yaranan iqtisadi sabitlik və əmin-amanlıq rabitə infrastrukturunun inkişafının bugünkü səviyyəyə çatmasına imkan vermişdir. Daha sonra qonaq öz ölkəsinin rabitə sahəsində əldə etdiyi nailiyyətlərdən danışmışdır. Nazir Əhməd Humeyd Əl-Tayer demişdir ki, biz sizə üç müqavilə layihəsi təqdim etmək istəyirik. Bu layihələr hər iki ölkəyə fayda gətirəcəkdir. Görüşdən sonra qonaqlar nazirlikdə yaradılmış “Rabitə” muzeyində Azərbaycan rabitəsinin tarixini əks etdirən fotostendlər və eksponatlarla tanış olmuşlar.
Bölmənin digər xəbərləri
