SİYASƏT
Bişkekdə Azərbaycanın Müstəqillik Günü qeyd edilib
Bakı, 31 may, AZƏRTAC
Bişkek şəhərində Müstəqillik Gününə həsr olunmuş tədbir keçirilib.
Azərbaycanın Qırğızıstandakı səfirliyi tərəfindən təşkil olunan tədbirdə azərbaycanlılarla yanaşı, Qırğızıstan hökumətinin təmsilçiləri, akkreditə olmuş xarici ölkə diplomatik korpusun, beynəlxalq təşkilatların, ictimai qurumların, yerli ictimaiyyət nümayəndələri və KİV təmsilçiləri iştirak ediblər.
Ölkəmizin Qırğızıstandakı səfirliyindən AZƏRTAC-a bildiriblər ki, Qırğızıstan və Azərbaycanın Dövlət himnlərinin səsləndirilməsi ilə başlayan tədbirdə səfir Lətif Qəndilov 28 May - Müstəqillik Gününün tarixi haqqında məlumat verib. Bildirib ki, 1918-ci il mayın 28-də Azərbaycan Xalq Cümhuriyyətinin yaranması ilə müsəlman Şərqində ilk dəfə demokratik respublika yaranıb, Azərbaycan xalqı müstəqilliyə qovuşub, ölkəmizin dünya birliyinin üzvü kimi tanınması prosesi başlayıb. O zaman cümhuriyyətimiz Azərbaycanı işğal etməyə cəhd göstərən erməni qruplaşmalarına 1918-ci ildə Nuri paşanın komandanlığı ilə Qafqaz İslam Ordusunun xalqımıza dəstək verməsi sayəsində qazanılıb. 1991-ci ildə isə Azərbaycan dövlət müstəqilliyini bərpa edib.
Yenidən müstəqilliyini qazanan Azərbaycan dövlətinin inkişafı və möhkəmləndirilməsi dünyaşöhrətli siyasi xadim və böyük dövlət xadimi, ümummilli lider Heydər Əliyevin böyük rolunu diqqətə çatdıran səfir 30 il düşmən tapdağı altında qalmış torpaqlarımızın məhz Ulu Öndər siyasətinin layiqli davamçısı İlham Əliyevin rəhbərliyi ilə azad olunduğunu vurğulayıb. Bu gün getdikcə daha da güclənən və sürətlə inkişaf edən Azərbaycanın dövlət müstəqilliyinin əbədi və sarsılmaz olacağına əminliyini bildirib.
Lətif Qəndilov Qırğızıstan-Azərbaycan əlaqələrinə də toxunaraq, prezident Sadır Japarovun Azərbaycana rəsmi səfəri çərçivəsində iki ölkə arasında strateji tərəfdaşlıq səviyyəsinə çıxarılan əlaqələrin və əməkdaşlığın daha da möhkəmlənəcəyini vurğulayıb.
Qırğız Respublikasının xarici işlər nazirinin müavini Aybek Moldoqaziyev ölkəsi adından Azərbaycanın müstəqilliyinin 104-cü ildönümünü təbrik edərək, dost, qardaş və strateji tərəfdaş olan ölkəmizin daha da inkişaf etməsini arzulayıb.
Sonra ikitərəfli əlaqələrin inkişafı və münasibətlərin daha da dərinləşməsi istiqamətində fəaliyyətlərinə görə Lətif Qəndilova Qırğız Respublikası Gömrük Komitəsinin sədri Samat İsabekov tərəfindən təsis edilən “Gömrük xidmətinin 30 illiyi” yubiley medalı təqdim olunub.
Tədbirin sonunda qırğız opera sənətçisi Almazbek İstambayev Müslüm Maqomayevin “Azərbaycan” mahnısını ifa edib. Klassik musiqisi sədaları altında qonaqlara milli mətbəximizin nümunələri təqdim edilib.