BMT-də dinlərarası və mədəniyyətlərarası dialoqun təşviqinə Azərbaycanın töhfəsi müzakirə edilib
Vaşinqton, 1 iyun, AZƏRTAC
Azərbaycan Respublikasının BMT yanında daimi nümayəndəsi Yaşar Əliyev mayın 31-də “Sülh və inkişaf uğrunda mədəniyyətlərarası dialoq” adlı tədbirdə bəyanatla çıxış edib. AZƏRTAC xəbər verir ki, tədbir Dünya Dialoq və İnkişaf naminə Mədəni Müxtəliflik Günü münasibətilə keçirilib.
Y.Əliyev Dünya Dialoq və İnkişaf naminə Mədəni Müxtəliflik Günü ilə əlaqədar bu mühüm tədbirin təşkilinə görə Kolumbiya, Macarıstan, Qətər, Seneqal, Slovakiya və Vanuatunun daimi nümayəndəliklərinə təşəkkür edərək bildirib ki, “2030-cu ilədək olan dövr üçün inkişaf sahəsində gündəliy”in məqsədlərində sülh sözü dəfələrlə xatırlanır, sülhün təşəkkülünə və dəstəklənməsinə yönəldilmiş səylərdə bütün üzvlərin bərabərhüquqlu iştirakı dəstəklənir. Sənəddə dünyanın təbii və mədəni müxtəlifliyi də alqışlanır və etiraf edilir ki, bütün mədəniyyətlər və sivilizasiyalar dayanıqlı inkişafın irəliləməsinə öz töhfəsini verə bilər.
Diplomat bildirib ki, Azərbaycan Birləşmiş Millətlərin daha yekdil, kompleks, səmərəli və məhsuldar fəaliyyətinin təmin edilməsinə yönəldilən islahatların keçirilməsi ilə bağlı BMT Baş katibinin səylərini tam dəstəkləyir. İlk növbədə, münaqişələrin aradan qaldırılmasına, nizamlanmasına və sülhün dəstəklənməsinə diqqət yetirilməsi sülh mədəniyyətinin və mədəniyyətlərarası dialoqun inkişafına yeni dinamika verib.
Y.Əliyev Azərbaycanın töhfəsindən danışarkən vurğulayıb ki, bizim çoxmillətli və çoxmədəniyyətli cəmiyyətimizi birləşdirən multikulturalizm və tolerantlıq Azərbaycanda ənənəvi dəyərlərdir. O deyib: “Mənim hökumətim mədəniyyətlərarası və dinlərarası dialoqun milli və beynəlxalq səviyyələrdə təşviqinə, ilk növbədə, əhəmiyyət verir”. Diplomat bildirib ki, 2016-cı il Azərbaycanda Multikulturalizm İli, 2017-ci il isə İslam Həmrəyliyi İli elan edilib.
Y.Əliyev daha sonra deyib: “Mədəniyyətlər və sivilizasiyalar arasında təbii körpü kimi Azərbaycanın rolu 2015-ci ildə birinci Avropa Oyunlarının və 2017-ci ildə İslam Həmrəyliyi Oyunlarının keçirilməsində, habelə başqa mühüm beynəlxalq tədbirlərin təşkilində özünü göstərib. 2016-cı ilin aprelində Azərbaycanda Birləşmiş Millətlər Təşkilatının Sivilizasiyalar Alyansının VII Qlobal Forumu keçirilib. Bu forumda 147 ölkədən 4000-dən çox nümayəndə iştirak edib. Bakı Bəyannaməsi bu Forumun mühüm yekunu olub. Bəyannamədə bütün dünyada müxtəlif dinlərin və mədəniyyətlərin ardıcılları arasında imkanların genişlənməsinə və dialoqun təşviqinə yönəlmiş təşəbbüslər qəbul edilib”.
Diplomat bildirib ki, Bakı prosesi belə təşəbbüslər sırasındadır. Azərbaycanın rəhbərliyi ilə həyata keçirilən Bakı prosesi dinlərarası və mədəniyyətlərarası dialoqu inkişaf etdirmək üçün irimiqyaslı platforma yaradır. BMT-nin Baş katibi sülh mədəniyyətinə dəstək, dünyanın maraqlarına uyğun olaraq dinlərarası və mədəniyyətlərarası dialoq, anlaşma və əməkdaşlıq barədə sonuncu məruzəsində mədəniyyətlərarası dialoqun təşviqində Bakı prosesinin mühüm rolunu xüsusi xatırladıb. Azərbaycanın UNESCO, ISESCO, BMT-nin Sivilizasiyalar Alyansı, Dünya Turizm Təşkilatı, Avropa Şurası ilə əməkdaşlıq şəraitində iki ildən bir təşkil etdiyi Ümumdünya Mədəniyyətlərarası Dialoq Forumu Bakı prosesinin ayrılmaz tərkib hissəsidir. 2017-ci ildə Bakıda keçirilən “Mədəniyyətlərarası dialoqun inkişafı: insan təhlükəsizliyi, sülh və davamlı inkişaf üçün yeni imkanlar” mövzusunda IV Ümumdünya Mədəniyyətlərarası Dialoq Forumunda 120-dən çox ölkədən təqribən 800 əlaqədar tərəf iştirak edib.
Y.Əliyev qeyd edib ki, BMT-nin Baş Məclisi “Dinlərarası və mədəniyyətlərarası dialoqun, qarşılıqlı anlaşmanın və sülh naminə əməkdaşlığın təşviqi” adlı A/Res/72/136 qətnaməsində Ümumdünya Mədəniyyətlərarası Dialoq Forumuna əsaslanaraq onu mədəniyyətlərarası dialoqun dəstəklənməsi üçün mühüm qlobal platforma adlandırıb. Bu il Bakı prosesinin 10-cu ildönümü qeyd edilir və bu münasibətlə silsilə tədbirlər təşkil ediləcək, o cümlədən 2018-ci il oktyabrın 4-6-da Bakıda yüksək səviyyəli VI Beynəlxalq Humanitar Forum keçiriləcək. Mədəniyyətlərarası dialoqa, sülh mədəniyyətinə və multikulturalizmə dair uğurlu təşəbbüslərin Birləşmiş Millətlər Təşkilatı və geniş beynəlxalq birlik tərəfindən davamlı surətdə dəstəklənməsi dinc və inklüziv cəmiyyətlərin yaradılması, stereotiplərin və yanlış təsəvvürlərin aradan qaldırılması və inkişaf proseslərinin həyata keçirilməsi üçün böyük əhəmiyyət daşıyır.
Azərbaycanın daimi nümayəndəsi Y.Əliyev nitqinin sonunda bildirib ki, Azərbaycan qarşılıqlı anlaşmaya dəstək və müxtəlifliyə hörmət səylərini davam etdirməyə çalışır və bu istiqamətdə əməkdaşlığın genişlənəcəyini səbirsizliklə gözləyir.
Yusif Babanlı
AZƏRTAC-ın xüsusi müxbiri
Vaşinqton
Bölmənin digər xəbərləri
