BMT Gününə həsr olunan “Güvən yürüşü” keçirilib
Bakı, 28 oktyabr, AZƏRTAC
Əlilliyi olan şəxslərin iştirakı ilə Bakı Dənizkənarı Bulvarda BMT Gününə həsr olunmuş “Güvən yürüşü” təşkil edilib.
BMT-nin Rezident Əlaqələndiricisinin ofisi, Əmək və Əhalinin Sosial Müdafiəsi və Gənclər və İdman nazirlikləri, Gənclər Fondu, DOST İnklüziv İnkişaf və Yaradıcılıq Mərkəzi və YARAT Müasir İncəsənət Məkanının birgə keçirdiyi “Güvən yürüşü”nün məqsədi cəmiyyətdə inklüzivliyin və bərabərliyin vacibliyini vurğulamaqdır.
Tədbirdə BMT-nin Azərbaycandakı rezident əlaqələndiricisi Vladanka Andreeva, əmək və əhalinin sosial müdafiəsi naziri Sahil Babayev, gənclər və idman nazirinin müavini İndira Hacıyeva, Gənclər Fondunun icraçı direktoru vəzifəsini müvəqqəti icra edən Qədir Xəlilov, həmçinin digər bir sıra dövlət qurumlarının, diplomatik korpusun, beynəlxalq təşkilatların rəhbərləri və könüllüləri iştirak ediblər.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən AZƏRTAC-a bildirilib ki, BMT-nin Azərbaycandakı rezident əlaqələndiricisi Vladanka Andreeva BMT-nin öz tərəfdaşları ilə birlikdə Dayanıqlı İnkişaf Məqsədlərinə (DİM) nail olmaq üçün çalışdığını qeyd edib. Qeyd olunub ki, BMT Gününə həsr olunmuş “Güvən yürüşü” inklüziv və bərabər cəmiyyətlərin qurulması məqsədi üçün çalışan qurumları və fərdləri bir araya gətirib: “BMT-nin əsasını qoymuş, sülh, dayanıqlı inkişaf və hər kəs üçün insan hüquqları naminə dəyər və prinsipləri özündə ehtiva edən BMT Nizamnaməsinin qəbul olunmasından 78 il ötür və həmin təsis sənədi bizim fəaliyyətimiz üçün böyük əhəmiyyət kəsb edir. Bu gün biz tərəfdaşlarımızla, o cümlədən əlilliyi olan şəxslərlə birlikdə inklüziv cəmiyyətin əhəmiyyəti və BMT-nin heç kəsi kənarda qoymamaqla bağlı qlobal vədi haqqında mesaj veririk. Biz inanırıq ki, fərqliliklərimiz bizi bütövlükdə daha güclü edir", - deyə Vladanka Andreeva bildirib.
Əmək və əhalinin sosial müdafiəsi naziri Sahil Babayev Prezident İlham Əliyevin tapşırıqları əsasında ölkəmizdə əlilliyi olan şəxslərin sosial müdafiəsi, reabilitasiya və sosial inteqrasiya imkanlarının artırılması üçün atılan mühüm addımları diqqətə çatdırıb. O, Birinci vitse-prezident Mehriban Əliyevanın təşəbbüsü ilə yaradılan və iki il əvvəl açılışı olan DOST İnklüziv İnkişaf və Yaradıcılıq Mərkəzinin əlilliyi olan şəxslərin yaradıcı potensialının inkişaf etdirilməsində önəmli rolunu vurğulayıb. Nazir bildirib ki, bu sahədə aparılan işlər “Əlillik qüsur deyil” fəlsəfəsinə əsaslanır. Həmin mərkəzdə təlimlərə cəlb olunaraq yaradıcı bacarıqlarını uğurla nümayiş etdirən əlilliyi olan şəxslər də bir daha təsdiq edirlər ki, doğurdan da əlillik yaradıcılıqla məşğul olmaq, yaratmaq, uğurlara nail olmaq üçün məhdudiyyət deyil.
S.Babayev son illər əlilliyi olan şəxslərlə bağlı qanunvericiliyin təkmilləşdirilməsi işlərini, əlilliyin müəyyən edilməsi sahəsində ötən il Ümumdünya Səhiyyə Təşkilatı ilə birgə hazırlanmış yeni meyarların tətbiqinə başlandığını qeyd edib. O, son beş ildə dövlət başçısının tapşırıqları ilə əlilliyi olan şəxslər üçün sosial ödənişlərin 5 dəfəyə yaxın artırıldığını, müasir reabilitasiya sisteminin yaradıldığını və yeni reabilitasiya mərkəzlərinin açıldığını, illik reabilitasiya xidməti ilə təmin olunanların sayının 60 minə çatdırıldığını bildirib. Ötən dövrdə xüsusi kateqoriyalara aid əlilliyi olan şəxslərə və şəhid ailələrinə 14 min mənzil və fərdi ev verildiyini, həmin əlilliyi olan şəxslərin avtomobillə təminatı sahəsində də görülən işləri diqqətə çatdırıb.
Nazir əlilliyi olan şəxslərə dövlət tərəfindən verilən reabilitasiya vasitələri siyahısının son illər əhəmiyyətli dərəcədə genişləndiyini, ölkədə əlilliyi olan şəxslərin yüksək texnologiyalı son nəsil protezlərlə təminatının da həyata keçirildiyini bildirib. S.Babayev əlilliyi olan şəxslərin istedad və bacarıqlarının inkişafına dəstək məqsədi daşıyan yeni inklüziv mərkəzlərin də yaradılmaqda olduğunu, həmin mərkəzlərin şəbəkəsinin bütün ölkə boyu genişləndiriləcəyini qeyd edib.
#heçkəskənardaqalmasın şüarı ilə “Suraxanı” gəmi-muzeyinin qarşısından başlayan yürüş YARAT Müasir İncəsənət Mərkəzində DOST İnklüziv İnkişaf və Yaradıcılıq Mərkəzinin əlilliyi olan benefisiarları və təlimçilərinin ifasında konsert proqramı ilə yekunlaşıb.
Bölmənin digər xəbərləri
