Boçorişvili: Gürcüstan-Azərbaycan-Türkiyə əməkdaşlığı faydalı layihələr həyata keçirə biləcəyimizi sübut edir
Tbilisi, 17 sentyabr, AZƏRTAC
Gürcüstanın üç qonşusu - Azərbaycan, Ermənistan və Türkiyə ilə strateji tərəfdaşlığı var, hər üç ölkə ilə əlaqələr bizim üçün çox dəyərlidir. Qlobal təhlükəsizlik məsələlərində də, ilk növbədə, əlbəttə ki, qonşularımızla münasibətlərdən danışmağa başlamalıyıq, qonşularımızla münasibətlər bizim üçün əsas prioritetdir.
AZƏRTAC xəbər verir ki, bu sözləri Gürcüstanın xarici işlər naziri Maka Boçorişvili ölkənin Birinci Kanalının (1tv.ge) “Cari mövzu – Maka Tsintsadze ilə” verilişində deyib.
Onun sözlərinə görə, Xarici İşlər Nazirliyinin təşəbbüsü ilə Azərbaycan, Gürcüstan və Ermənistan Xarici İşlər nazirlikləri arasında ilk görüşə Tbilisi ev sahibliyi edib. Biz bölgə üçün vacib olan mövzuları müzakirə etməyə hazırıq və biz bu prosesdə tərəfdaşlarımızla fəal şəkildə çalışacağıq.
XİN rəhbəri deyib ki, Gürcüstan Azərbaycan və Türkiyə ilə üçtərəfli əməkdaşlıq formatında bir sıra mühüm layihələr həyata keçirib və bu əməkdaşlıq ölkələrimizin mehriban qonşuluq və dostluq münasibətləri vasitəsilə təkcə özümüz üçün deyil, həm də daha geniş region üçün faydalı layihələr həyata keçirə biləcəyini sübut edir.
“Geniş regiona artıq Mərkəzi Asiya və Avropa ölkələri daxildir ki, bu ölkələr üçün regionumuzun təhlükəsizliyi və əməkdaşlığı da mühüm əhəmiyyət kəsb edir. Gürcüstan hökuməti də bunun üçün, ilk növbədə, qonşu dövlətlərlə əlaqələri gücləndirməyə çalışır. Bu da bizim təhlükəsizliyimiz, regionumuzun iqtisadi inkişafı üçün çox vacibdir və təbii ki, biz bu istiqamətdə işi davam etdirəcəyik”, - deyə Boçorişvili vurğulayıb.
Nazir deyib: “Çox yaxında Tbilisidə daha bir beynəlxalq konfrans keçiriləcək və burada bir daha ölkəmizin rolu, funksiyası, Gürcüstanın bu istiqamətdə inkişaf etdirdiyi beynəlxalq əməkdaşlıq haqqında danışmaq imkanımız olacaq”.
AZƏRTAC-ın xüsusi müxbiri
Tbilisi
Bölmənin digər xəbərləri
