Boksçumuz Nəbi İsgəndərov Avropa çempionatının səkkizdəbir final mərhələsinə yüksəlib
Bakı, 14 mart, AZƏRTAC
Xorvatiyanın Poreç şəhərində 22 yaşadək boksçular arasında Avropa çempionatı davam edir.
AZƏRTAC xəbər verir ki, yarışın ikinci günündə - martın 14-də Azərbaycan millisinin daha 2 üzvü mübarizəyə qoşulub.
Boksçumuz Nəbi İsgəndərov 1/16 final mərhələsi çərçivəsində Luka Nikabadze (Gürcüstan) ilə qarşılaşıb. Çempionatda 67 kiloqram çəki dərəcəsində mübarizə aparan təmsilçimiz 5:0 (29:27, 29:27, 29:27, 29:27, 29:27) hesablı qələbə qazanıb.
Azərbaycan çempionu səkkizdəbir finalda ilk görüşdən azad olan Alen Ahmetoviçlə (Xorvatiya) üz-üzə gələcək. Döyüş martın 15-də olacaq.
Yığmamızın digər üzvü Mirşərif Kazımzadə (75 kq) 1/16 finalda şotlandiyalı Hikki Samla qarşılaşıb və rəqib mərhələ adlayıb.
Qeyd edək ki, martın 15-də Nəbi İsgəndərov və millimizin digər boksçusu - Murad Allahverdiyev (80 kq) rinqə çıxacaqlar.
Bölmənin digər xəbərləri
