Bakı, 1 may, AZƏRTAC

Laçın-Xankəndi yolunun başlanğıcında sərhəd-buraxılış məntəqəsindən sabit qaydada keçidin təmin olunması elə bu məntəqənin təsis edilməsi qədər vacib addımdır. Azərbaycan bu prosesin reallaşmasına nail olmaqla, ilk növbədə, göstərdi ki, Ermənistan rəsmilərinin və Ermənistanın havadarlarının “etnik təmizləmə” və Laçın yolunun “blokadası” ilə bağlı iddiaları çirkin məqsəd daşıyan növbəti yalan təbliğat kampaniyasından başqa bir şey deyil. Necə ki, ekofəalların aksiyası zamanı, eləcə də sərhəd-buraxılış məntəqəsinin qurulması prosesindən sonra Laçın-Xankəndi yolu humanitar məqsədlər üçün, qeyri-hərbi yüklərin, nəqliyyat vasitələrinin və şəxslərin qanuni hərəkəti üçün açıqdır, bu mənada, Azərbaycan tərəfindən real vəziyyəti ehtiva edən görüntülərin yayılması bütün gücünü toplayaraq “blokadada qalmış, ayrı-seçkiliyə və etnik təmizləməyə məruz qalan məzlum erməni” kartı üzərindən anti-Azərbaycan təbliğatına başlayan güc mərkəzlərini pat vəziyyətinə saldı.

Bu sözləri AZƏRTAC-a açıqlamasında Milli Məclisin deputatı Bəhruz Məhərrəmov deyib.

Deputat bildirib: “Digər tərəfdən erməni əsilli sakinlərin sərhəd-buraxılış məntəqəsinə yaxınlaşması və keçid prosedurlarına riayət edərək Azərbaycan Bayrağı altında Azərbaycan sərhədçilərinin sərhəd-keçid prosedurları ilə bağlı qanuni əmrlərinə sözsüz tabe olmaları göstərdi ki, Qarabağ iqtisadi rayonunun erməni əsilli sakinlərinin Azərbaycana, Azərbaycanın hüquqi yurisdiksiyasına reinteqrasiyası qarşısında birbaşa əngəl yoxdur. Ermənilər Azərbaycanın tam hüquqlu vətəndaşı kimi Azərbaycan dövlətinə mənsub olmaq, onunla siyasi və hüquqi bağlılığa, habelə qarşılıqlı hüquq və vəzifələrə malik olmağa hazırdır. Demək, artıq başlanmış, hazırda isə ləngiyən reinteqrasiya prosesində əsas maneə separatçı xunta, Ermənistan rəhbərliyi və Ermənistanın Fransa kimi havadarlarıdır. Lakin müşahidə olunan odur ki, Vətən müharibəsində qazanılan şanlı Zəfər, habelə Prezident İlham Əliyevin hücum siyasəti doktrinası bu kimi kənar və təhlükəli ünsürləri böyük uğurla dövriyyədən çıxarmaqdadır. Fransa artıq bölgədə ümumiyyətlə söz sahibi deyil, Ermənistanın Azərbaycan qarşısında vəziyyəti zatən aydındır. Separatçılara gəlincə, dövlətimizin başçısı bu il aprelin 18-də onlarla bağlı fikirlərini açıq formada ifadə edib ki, “onlar ya bizim sözümüzlə oturub-duracaqlar, ya da ki, oradan rədd olacaqlar və orada yaşayan, onların faktiki olaraq girovuna, əsirinə çevrilmiş erməniləri də rahat buraxacaqlar”.

B.Məhərrəmov qeyd edib ki, 2020-ci il 10 noyabr tarixli Bəyanatın 6-cı maddəsinə əsasən, Azərbaycan Laçın dəhlizi üzrə hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verib. “Lakin yola bizim nəzarət etmədiyimiz müddətdə, sərhəd-buraxılış məntəqəsi olmadığı zaman Azərbaycan üzərinə düşən hər şeyi etsə də, bu zəmanət faktiki olaraq formal xarakter daşıyıb. Beləliklə, Laçın-Xankəndi yolunda sərhəd-buraxılış postunun yaradılması ilə Azərbaycan suveren hüquqları ilə yanaşı, həm də yolda təhlükəsizliyi təmin etmək üçün real imkanlarını bərqərar etdi. Təqdim olunan kadrlardan göründüyü kimi, Azərbaycan sərhədçiləri tərəfindən yüksək peşəkarlıqla qaydalara uyğun olaraq nizam-intizamla və nəzakətli şəkildə keçidi təmin etməklə, əslində, üçtərəfli Bəyanat üzrə öhdəliklərini yerinə yetirir və bu prosesə qarşı çıxan hər kəs Azərbaycanın suveren hüquqlarına hörmətsizliklə bərabər, həm də bəyanatın şərtlərinə qarşı çıxır. Təbii ki, bölgənin söz sahibi, əsas və yeganə gücü Azərbaycan bu kimi cılız cəhdlərə meydan verməyəcək. Müzəffər Ali Baş Komandanın dediyi kimi, “Biz dəfələrlə göstərmişik ki, bu torpaqların sahibləri bizik və heç kimə imkan vermərik ki, bizim ərazimizdə kimsə at oynatsın”, - deyə Milli Məclisin deputatı vurğulayıb.