Bosniya və Herseqovina yığması həndbol üzrə “Challenge Trophy” yarışının qalibi olub
Bakı, 4 iyun, AZƏRTAC
Bosniya və Herseqovinanın Tuzla şəhərində 2000-2001-ci il təvəllüdlü qızlar arasında keçirilən “Challenge Trophy” yarışına yekun vurulub.
Azərbaycan Həndbol Federasiyasından AZƏRTAC-a bildirilib ki, turnirin finalında Bosniya və Herseqovina həndbolçuları Belçika komandası ilə qarşılaşıblar. Gərgin və maraqlı keçən görüşdə 27:26 hesabı ilə qələbə qazanan meydan sahibləri yarışın qızıl medallarına sahib olublar.
Bürünc medal uğrunda keçirilən matçda isə Lüksemburq Estoniyanı minimal hesabla məğlub edib - 22:21.
Beşinci-altıncı yerlər uğrunda qarşılaşmada Moldova Kipri asanlıqla məğlubiyyətə uğradıb - 41:24.
Digər təsəlliverici oyunda isə Azərbaycan yığması Böyük Britaniya millisindən 28:22 hesabı ilə üstün olaraq turniri yeddinci pillədə başa vurub. “KSPC Mejdan”da keçirilən matçı xorvatiyalı İvana Koren və Vedrana Stancir idarə ediblər. Avropa Həndbol Federasiyasını isə rusiyalı Luidmila Bodnieva və Bosniya və Herseqovinadan olan Vladimir Yoviç təmsil edib.
Qeyd edək ki, bu, komandamızın turnirdə ilk qələbəsi olub.
Turnirin ən məhsuldar oyunçusu olan Azərbaycan həndbolçusu Kamila Bayramova rəqib qapılarından 45 top keçirib.
Bölmənin digər xəbərləri
