BÖYÜK BRİTANİYA PARLAMENT NÜMAYƏNDƏ HEYƏTİNİN AZƏRBAYCANA SƏFƏRİ
Böyük Britaniya parlamenti lordlar və icmalar palatalarının nümayəndə heyəti mayın 30-da axşam Bakıya səfərə gəlmişdir.
Binə hava limanında qonaqları Milli Məclisin deputatları, Azərbaycanın Böyük Britaniyadakı səfiri Rəfael İbrahimov qarşıladılar.
X X X
Mayın 31-də səhər nümayəndə heyətinin üzvləri Şəhidlər xiyabanını ziyarət edərək, Azərbaycanın azadlığı, müstəqilliyi və ərazi bütövlüyü uğrunda canlarından keçmiş qəhrəmanların xatirəsini ehtiramla andılar, “Əbədi məşəl” abidəsinin önünə əklil qoydular.
X X X
Şəhidlər xiyabanını ziyarətdən sonra Böyük Britaniya parlamentinin üzvləri Devid Alton və Robert Veyrinq Mərkəzi Seçki Komissiyasının sədri Məzahir Pənahovla görüşdülər.
Dostluq şəraitində keçən görüşdə Mərkəzi Seçki Komissiyasının sədri qonaqlara bu komissiyanın formalaşdırılması prinsipləri, “Mərkəzi Seçki Komissiyası haqqında” Qanunun Avropa standartlarına uyğun olması, Azərbaycandakı mövcud seçki sistemləri barədə məlumat verdi. O, 2000-ci il noyabrın 5-də keçirilmiş parlament seçkilərində ədalətin və demokratikliyin təmin edilməsi üçün görülmüş tədbirlərdən də danışdı.
Böyük Britaniya Leyboristlər Partiyasının və icmalar palatasının üzvü lord Robert Veyrinq xüsusi vurğuladı ki, o, Azərbaycanda prezident seçkilərində müşahidəçi vəzifəsini yerinə yetirərkən Dəvəçi və digər seçki dairələrində seçkilərin ədalətlə keçirildiyinin şahidi olmuşdur. Qonaqlar həmçinin bildirdilər ki, Azərbaycanda seçkilərin qanunvericilik bazası öz mütərəqqi müddəaları baxımından Böyük Britaniyanın seçki qanununa tam uyğundur.
X X X
Həmin gün Böyük Britaniya parlamenti lordlar və icmalar palatalarının üzvlərini baş nazirin müavini, Dövlətqaçqınkomun sədri Əli Həsənov qəbul etdi.
Baş nazirin müavini İngiltərə parlamenti üzvlərinin xalqımızla həmrəylik əlaməti olaraq, iyunun 1-də Biləsuvar rayonundakı çadır şəhərciyinə getməyə və məcburi köçkünlərlə görüşməyə vaxt tapa biləcəklərindən məmnunluq duyduğunu bildirdi.
Sonra Əli Həsənov qonaqlara Ermənistan-Azərbaycan, Dağlıq Qarabağ münaqişəsinin tarixi və səbəbləri barədə müfəssəl məlumat verdi. O, xüsusi vurğuladı ki, erməni lobbisinin bu münaqişəni dünya birliyinə kiçik etnik qarşıdurma kimi qələmə vermək cəhdlərinin heç bir əsası yoxdur. Əli Həsənov beynəlxalq humanitar təşkilatların fəaliyyətindən danışaraq, İngiltərə təşkilatlarının, o cümlədən OKSFAM humanitar təşkilatının fəaliyyətini xüsusi nəzərə çarpdırdı. Eyni zamanda, təəsüflə vurğuladı ki, Ermənistanın qeyri-konstruktiv mövqe tutması nəticəsində münaqişənin nizama salınmasına dair danışıqlar prosesi uzandığına görə, qaçqınlara və məcburi köçkünlərə yardım göstərən humanitar təşkilatların proqramlarının müddəti bitmişdir.
Britaniyalı qonaqlar məlumata görə təşəkkür edərək, bildirdilər ki, vətənə qayıtdıqdan sonra öz ölkəsinin hökumətinə Azərbaycan qaçqınları və məcburi köçkünlərinin ağır vəziyyəti haqqında məlumat verəcək və onlara hökumət yardımı göstərilməsinin zəruriliyini müzakirəyə çıxarmaq barədə məsələ qaldıracaqlar.
X X X
Mayın 31-də Böyük Britaniya parlament nümayəndə heyətinin üzvləri Azərbaycanın dini icmalarının rəhbərləri ilə görüşdülər.
Qafqaz Müsəlmanları İdarəsinin sədri şeyxülislam Hacı Allahşükür Paşazadə görüşü açaraq dedi ki, müstəqillik əldə edildikdən sonra Azərbaycanda vicdan və din azadlığı təmin olunmuşdur. Azərbaycanın müxtəlif dinlərə etiqad edən vətəndaşları - müsəlmanlar, xristianlar və yəhudilər bir-birinə hörmət və qarşılıqlı anlaşma şəraitində yaşayırlar. Ölkədə bütün dini icmaların nümayəndələri üçün əlverişli şəraitin yaradılması beynəlxalq aləmdə də Azərbaycanın nüfuzuna müsbət təsir göstərir. Moskvanın və Bütün Rusiyanın patriarxı II Aleksinin və Roma katolik kilsəsinin başçısı II İoann Pavelin Bakıya səfərləri buna sübutdur. Hacı Allahşükür Paşazadə vurğuladı ki, vətəndaşların dini hüquqlarının təmin edilməsində Azərbaycan Prezidenti Heydər Əliyevin böyük xidmətləri vardır.
Rus Pravoslav kilsəsinin Bakı-Xəzəryanı bölgə yeparxiyasının başçısı yepiskov Aleksandr Azərbaycan Prezidenti Heydər Əliyevin müxtəlif dini icmaların nümayəndələrinə qayğı və diqqət göstərdiyini xüsusi vurğuladı.
Böyük Britaniya parlamenti lordlar palatasının üzvü, lord Əhməd müsəlmanların hüquq bərabərliyindən danışaraq bildirdi ki, İngiltərədə 2 milyondan çox müsəlman yaşayır, dövlət tərəfindən maliyyələşdirilən 100-dək müsəlman məktəbi fəaliyyət göstərir. Bundan əlavə, İngiltərə parlamentində 6 müsəlman deputat var. İslam dininin nümayəndələri Böyük Britaniyanın yerli orqanlarında geniş təmsil olunmuşlar. Məsələn, Birmingem kimi böyük şəhərin meri müsəlmandır.
Görüşün sonunda Hacı Allahşükür Paşazadə qonaqlara fotoalbom və qiymətli hədiyyə təqdim etdi.
X X X
Həmin gün Böyük Britaniya parlamenti nümayəndə heyətinin üzvləri Dini Qurumlarla İş üzrə Dövlət Komitəsində də görüş keçirdilər.
Komitə sədrinin müavini Mustafa İbrahimov qonaqlara Dövlət Komitəsinin strukturu və fəaliyyəti, habelə dini qurumlarla aparılan iş barədə ətraflı məlumat verdi.
Böyük Britaniya parlamentinin üzvləri İngiltərədə müxtəlif dinlərə etiqad edən vətəndaşların hüquqlarının təmin olunması sahəsində həyata keçirilən tədbirlərdən danışdılar.
X X X
Daha sonra qonaqlar Milli Məclisin ümumi iclasında iştirak etdilər.
Azərbaycan parlamentinin sədri Murtuz Ələsgərov İngiltərə parlamentinin üzvlərini təqdim edərək bildirdi ki, onlar ölkəmizə Milli Məclis rəhbərliyinin dəvəti ilə gəlmişlər.
X X X
Həmin gün axşam Böyük Britaniya parlamenti lordlar və icmalar palataları üzvlərinin şərəfinə Milli Məclis adından qəbul təşkil edildi.
Bölmənin digər xəbərləri
