“Brent” neftinin qiyməti fevraldan indiyədək ilk dəfə 55 dolları ötüb
Bakı, 8 yanvar, AZƏRTAC
“Brent” markalı xam neftin bir barrelinin qiyməti ötən ilin fevral ayından bu vaxtadək ilk dəfə 55 dolları keçib.
AZƏRTAC xəbər verir ki, qiymətlər Səudiyyə Ərəbistanının neft hasilatını könüllü azaltması ilə tədarük bolluğunun zəifləyəcəyinə dair nikbin gözləntilər fonundan bu həftəni qazancla tamamlamağa yönəlib.
Hazırda “Brent” neftinin bir barreli Londonun ICE birjasında 55,12 dollara, “Light” markalı xam neftin bir barreli isə Nyu-Yorkun NYMEX birjasında 51,46 dollara satılır.
Xatırladaq ki, “OPEC+” ölkələri nazirlərinin yanvarın 6-da keçirilən 13-cü iclasında gündəlik xam neft hasilatı üzrə mövcud kvotaların fevral-mart aylarında da davam etdirilməsi barədə qərar qəbul edilib. Yeni razılaşmaya əsasən, “OPEC+” ölkələrinin gündəlik xam neft hasilatı üzrə ixtisarları fevralda 7 milyon 125 min barrel, martda isə 7 milyon 50 min barrel təşkil edəcək.
Azərbaycanın isə bu ilin yanvar ayındakı 123 min barrel həcmində öhdəliyi fevral-mart aylarında sabit şəkildə qalacaq. “Əməkdaşlıq Bəyannaməsi”nə əsasən, növbəti iki ayda Azərbaycan gündəlik xam neft hasilatını 8 min barrel artıraraq istehsalı 595 min barrel səviyyəsində saxlayacaq.
Səudiyyə Ərəbistanı “OPEC+” ölkələrinin iqtisadiyyatlarına dəstək vermək üçün fevral-mart aylarında neft hasilatını könüllü olaraq 1 milyon barrel azaldacağını qeyd edib.
Bölmənin digər xəbərləri
