Britaniya ordusunun raket imkanlarına 190 milyon funt ayrılıb
London, 7 iyul, AZƏRTAC
Böyük Britaniya hökuməti ölkə ordusunun döyüş qabiliyyətini gücləndirmək və NATO çərçivəsində çəkindirmə potensialını artırmaq məqsədilə yeni dəqiq zərbə raketi sisteminin alınmasına 190 milyon funt sterlinq vəsait ayırıb.
AZƏRTAC xəbər verir ki, bu maliyyə hökumətin 298 milyard funt sterlinqlik müdafiə investisiya planı çərçivəsində təmin ediləcək. Yeni raket sistemi Britaniya ordusunun uzaq məsafələrdəki hədəfləri aşkarlamaq, izləmək və məhv etmək imkanlarını əhəmiyyətli dərəcədə genişləndirəcək.
Səsdən sürətli ballistik raket olan dəqiq zərbə raketi 500 kilometrədək məsafədə yerləşən sabit hədəfləri vurmaq qabiliyyətinə malikdir. Sistem düşmənin silahları, hərbi obyektləri və təchizat xətlərini NATO qüvvələri və əraziləri üçün təhlükə yaratmadan əvvəl sıradan çıxarmağa imkan verəcək. Hazırda ABŞ-nin “Lokhid Martin” şirkəti tərəfindən istehsal olunan dəqiq zərbə raketləri Böyük Britaniyanın modernləşdirilmiş M270A2 çoxsaylı reaktiv yaylım atəşi sistemləri ilə tam uyğun olduğundan əlavə texniki dəyişikliklərə ehtiyac qalmayacaq.
Bölmənin digər xəbərləri
