Britaniyada gənclər süni intellekt qorxusu fonunda peşəkar texniki sahələrə yönəlirlər
London, 2 dekabr, AZƏRTAC
Süni intellektin sürətlə iş yerlərini dəyişdirdiyi və bəzi sahələrdə işçi qüvvəsini əvəzlədiyi bir dövrdə Böyük Britaniyada getdikcə daha çox gənc uzunmüddətli və dayanıqlı karyera üçün peşəkar texniki sahələrə üz tutur.
AZƏRTAC “Reuters”ə istinadla xəbər verir ki, Britaniya işəgötürənlərinin altıdabiri qarşıdakı 12 ayda süni intellekt vasitələrinin işçi sayını azaltmağa imkan verəcəyini düşünür.
Bu, İnsan Resursları üzrə Peşəkar İnstitutun (CIPD) ötən ay keçirdiyi sorğunun nəticəsidir. Bir çox gənc minlərlə funt borc yükü yarada biləcək universitet təhsilindən imtina edərək, alternativ olaraq texniki peşələrə yönəlir. Avqust ayında ölkənin ən böyük həmkarlar ittifaqları birliyi “Trades Union Congress” tərəfindən 2 min 600 nəfər arasında aparılan sorğu göstərib ki, Britaniya vətəndaşlarının yarısı, xüsusilə 25–35 yaş arası insanlar süni intellektin iş yerlərinə təsirindən narahatdır.
London Kral Kollecində müəllim və süni intellekt tədqiqatçısı Bauke Kleyn Tislink bildirib ki, hazırda gənclər arasında ciddi narahatlıq var və onlar gələcəkdəki işlərinin avtomatlaşdırılacağından qorxurlar.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
