Bu gündən etibarən Avropanın beş ölkəsindən Estoniyaya gələnlər karantinə alınacaqlar
Tallin, 12 iyul, AZƏRTAC
İyul ayının 12-dən etibarən Estoniyaya 30-dan çox Avropa ölkəsindən məhdudiyyət tətbiq edilmədən gəlmək mümkündür, lakin Estoniyaya çatdıqdan sonra özünütəcrid rejiminə üç deyil, artıq beş Avropa ölkəsindən gəlmiş şəxslər riayət etməli olacaq.
AZƏRTAC Estoniya mətbuatına istinadla xəbər verir ki, Portuqaliya, Kipr, İngiltərə ilə yanaşı, bu həftənin siyahısına Andorra və İspaniyanın adı əlavə edilib.
Bildirilib ki, Estoniyaya gələn şəxslərə ongünlük hərəkət məhdudiyyətinin tətbiq edilməsi onların yola düşdüyü ölkədə COVID-19-a ümumi yoluxma göstəricisi ilə əlaqədardır. Hərəkət məhdudiyyətinin tətbiq edilməməsi üçün həmin ölkələrdə yoluxma faktı son iki həftə ərzində 100 min nəfər sakinə 150 haldan az təşkil etməlidir.
Qeyd edilib ki, bu gündən etibarən Avstriya, Belçika, Bolqarıstan, Hollandiya, Xorvatiya, İrlandiya, İslandiya, İtaliya, Yunanıstan, Litva, Lixtenşteyn, Lüksemburq, Latviya, Malta, Monako, Norveç, Polşa, Fransa, İsveç, Rumıniya, Almaniya, San-Marino, Slovakiya, Sloveniya, Finlandiya, İsveçrə, Danimarka, Çexiya və Macarıstandan Estoniyaya gələn hər kəs ölkəyə daxil olarkən özünütəcrid rejiminə əməl etməli olmayacaq.
Asiman Əsədov
AZƏRTAC-ın xüsusi müxbiri
Tallin
Bölmənin digər xəbərləri
