Bu il Energetika Nazirliyi və tabeli qurumlara 8500-dən çox müraciət daxil olub
Bakı, 15 oktyabr, AZƏRTAC
Cari ilin doqquz ayı ərzində Energetika Nazirliyi və tabeli qurumlara ümumilikdə 8519 vətəndaş müraciəti daxil olub.
Energetika Nazirliyindən AZƏRTAC-a bildirilib ki, müraciətlərdən 1339-u məlumat, 7180-i isə icra xarakterli olub.
Bunlardan 6835-i müvafiq qaydada icra edilib, 1684 müraciət isə icradadır. Müraciətlər əsasən elektrik enerjisi şəbəkəsinə qoşulma və texniki şərtin verilməsi, elektrik enerjisinin keyfiyyəti və verilişində fasilələrin yaranması, elektrik qurğu və avadanlıqlarının istismar vəziyyəti, elektrik veriliş xəttinin mühafizə zonasının pozulması və kabelləşmə, qazlaşma, borc və cərimələr, sayğaclarda yaranan qüsurlar, bərpaolunan enerji, qəbula yazılmaq, kadr məsələləri, icazələr və digər mövzuları əhatə edib.
Hesabat dövründə nazirliyin Aparatının və tabeli qurumların rəhbər vəzifəli şəxsləri tərəfindən 431 vətəndaş qəbul edilib və qəbullar zamanı səsləndirilən müraciətlərin qanunvericiliyin tələblərinə uyğun həlli üçün müvafiq tapşırıqlar verilib.
Bölmənin digər xəbərləri
