Budapeşt “Vışeqrad qrupu” üzrə tərəfdaşını dəstəkləyib
Budapeşt, 11 oktyabr, AZƏRTAC
Vişeqrad Qrupuna (V4) üzv ölkələrin son zirvə görüşündə bu dövlətlər Brüssellə və Avropa İttifaqı xaricindəki mübahisələrdə bir-birini dəstəkləməyi qərara alıblar.
AZƏRTAC xəbər verir ki, bu razılaşmalar qısa müddət ərzində praktiki reallığa çevrilib. Bu gün Macarıstan hökuməti Avropa İttifaqı ilə Polşanın mübahisəsində Polşanı rəsmən dəstəkləyib. Macarıstanın Baş naziri Viktor Orban radio ilə xalqa həftəlik müraciətində Brüsseli öz səlahiyyətlərini tədricən genişləndirmək yolu ilə Aİ-yə üzv dövlətlərin hüquqlarını pozmaqda ittiham edərək, Aİ-ni "üzv dövlətlərin suverenliyinin hədlərinə hörmət etməyə" çağırıb.
Xatırladaq ki, bu günlərdə Polşa Konstitusiya Məhkəməsi Aİ qanunlarının Aİ-yə üzv ölkələrin milli qanunvericiliyindən üstünlüyünü qeyri-qanuni hesab edib. Məsələ ondadır ki, bu yaxınlarda Avropa Komissiyasının prezidenti Ursula fon der Lyayen, konstitusiya müddəaları da daxil olmaqla, Aİ qanunlarının milli qanunvericilikdən üstün olduğunu bildirib. Almaniya və Niderland o zaman Brüsseli dəstəkləyiblər.
Orban isə Aİ qanunlarının üstünlüyünün yalnız Aİ-nin səlahiyyətli olduğu sahələrdə tətbiq oluna biləcəyini bildirərək, belə bir ifadəni rədd edib. O, Aİ qanunlarının milli qanunlardan üstün olması ilə bağlı Avropa məmurlarının fikirləri ilə razılaşmayan Polşa hökumətinin başçısı Mateuş Moravetskini dəstəkləyib.
Görünür, Brüsseldəki mərkəzlə Avropa İttifaqına üzv ölkələr arasında Avropa siyasi diskursunun daxilində yeni qarşıdurmalar başlanır.
Pərvanə Qarayeva
AZƏRTAC-ın xüsusi müxbiri
Budapeşt
Bölmənin digər xəbərləri
