CAR-ın nazir müavini Azərbaycanın azad edilmiş ərazilərdə gördüyü işlər barədə məlumatlandırılıb
Bakı, 23 dekabr, AZƏRTAC
Dekabrın 23-də Azərbaycan Respublikasının Cənubi Afrika Respublikasındakı (CAR) səfirliyinin müvəqqəti işlər vəkili Hüseyn Rəhimli Pretoriya şəhərində bu ölkənin xarici işlər nazirinin müavini Alvin Botes ilə görüşüb.
Səfirlikdən AZƏRTAC-a bildirilib ki, görüşdə H.Rəhimli CAR-dakı səfirliyimizə müvəqqəti işlər vəkili təyin olunması ilə əlaqədar verbal notanı qarşı tərəfə təqdim edib. H.Rəhimlini ölkəsində diplomatik fəaliyyətə başlaması münasibətilə təbrik edən nazir müavini ona Azərbaycan ilə CAR arasında əlaqələrin möhkəmləndirilməsi və əməkdaşlığın genişləndirilməsi istiqamətində uğurlar diləyib.
Söhbət zamanı ikitərəfli əlaqələrin müsbət dinamikası qeyd edilib, hər iki ölkənin BMT, Qoşulmama Hərəkatı və digər mühüm beynəlxalq təşkilatlar çərçivəsində sıx əməkdaşlıq etməsinin dövlətlərimiz üçün mühüm əhəmiyyət daşıyan beynəlxalq məsələlərdə mövqelərin qarşılıqlı dəstəklənməsinin bariz nümunəsi olduğu vurğulanıb.
H.Rəhimli işğaldan azad edilən ərazilərdə reallaşdırılan genişmiqyaslı bərpa-quruculuq tədbirlərinin görülməsi, habelə müasir sosial-mədəni infrastrukturun qurulması, o cümlədən kommunikasiya və nəqliyyat xətlərinin bərpası istiqamətində aparılan işlər, eləcə də ölkəmizin üzləşdiyi mina problemi haqqında məlumat verib.
Bölmənin digər xəbərləri
