Bakı, 18 may, Ceyhun Rüstəmov, AZƏRTAC

Xəbər verdiyimiz kimi, mayın 21-23-də Bakıda IX Azərbaycan Beynəlxalq kənd təsərrüfatı (“Caspian Agro 2015”) sərgisi keçiriləcək. Nəzərə alsaq ki, bu il, həmçinin “Kənd təsərrüfatı ili”dir, o zaman bu sərginin əhəmiyyəti daha da artır. Azərbaycanda keçirilən bir sıra beynəlxalq sərgi və konqreslərin təşkilatçısı, o cümlədən bu kimi tədbirlərin peşəkar operatoru olan “Caspian Event Organisers” (CEO) şirkətinin icraçı direktoru Bəhruz Hidayətzadə bununla bağlı AZƏRTAC-ın suallarını cavablandırıb:

- Cari ilin “Kənd təsərrüfatı ili” elan edilməsi, həm də “Caspian Agro 2015” sərgisinin önəmini artırır. Sizcə builki sərgi digərlərindən nə ilə fərqlənəcək?

- Bu gün ölkəmizin dövlət siyasəti iqtisadiyyatın qeyri-neft sektorunun şaxələndirilməsinə yönəldilib. Respublikada kənd təsərrüfatı sahəsi fəal surətdə inkişaf edərək Azərbaycanın ixrac potensialının artırılmasına öz töhfəsini verir. Yeni texnologiyaların tətbiqi və təcrübə mübadiləsi ixrac olunan yüksək keyfiyyətli məhsulların istehsalı üçün vacib şərtlərdir və beynəlxalq “CaspianAgro” sərgisi də bütün bu imkanları hər il təmin edir. Beləliklə, sərgi qısa müddət ərzində beynəlxalq əməkdaşlıq əlaqələrinin qurulmasına şərait yaratmaqla yanaşı, Azərbaycanın kənd təsərrüfatı sektoruna yatırılan sərmayələrin artırılmasına və ən yeni texnologiyaların tətbiqinə imkan verir.

Keçirildiyi illər ərzində “CaspianAgro” sərgisi hər il mütəxəssislər arasında görüşlərin təşkili, kənd təsərrüfatı sahəsi üçün texnika və avadanlıqların, habelə məhsul və xidmətlərin nümayişi baxımından etibarlı bünövrə kimi özünü doğrultmuşdur. İqtisadiyyatın bu sektoru ölkə rəhbərliyinin böyük diqqət yetirdiyi sahələrdən biridir. Belə ki, Azərbaycan Prezidenti İlham Əliyev artıq bir neçə ildir ardıcıl olaraq “CaspianAgro” sərgisini ziyarət edərək istehsalçı və yeni məhsullarla tanış olur. Uzun illərdir Kənd Təsərrüfatı Nazirliyi bu sərgiyə fəal və mühüm dəstək verir. Bundan əlavə qeyd etmək istərdim ki, sərgi Prezident İlham Əliyevin təsdiqlədiyi “Kənd təsərrüfatı ili”nə həsr olunmuş Tədbirlər Planına daxil edilib və bu, “CaspianAgro 2015” sərgisinin inkişafına müsbət təsir etməklə yanaşı, hər il keçirilən bu ixtisaslaşdırılmış tədbirə marağı daha da artırıb.

Builki sərgi digərlərindən çox fərqlənəcək. Sərgi sahəsinin həcmi artıb, iştirakçıların sayı çoxalıb, sərgi iştirakçılarının coğrafiyası genişlənib. Hər dəfə sərgidə təqdim edilən məhsulların çeşidi genişlənir, yeni sektorlar əlavə olunur. Builki sərginin fərqləndirici cəhəti maldarlıq sahəsi üzrə sərgi iştirakçılarının əhəmiyyətli dərəcədə artmasıdır. Bakı Ekspo Mərkəzinin açıq meydançasında ilk dəfə olaraq ən yaxşı yerli və xarici damazlıq heyvan cinsləri - keçi, inək, dəvə, qoyun, eləcə də dağ atlarının qədim cinsi - Qarabağ atları nümayiş etdiriləcək. Ölkənin maldarlıq potensialının əyani nümayişi həm daxili, həm də beynəlxalq bazarlarda kənd təsərrüfatı məhsullarının rəqabətlilik qabiliyyətini artıracaq.

- Sərgi iştirakçılarının ümumi sayının 140 şirkətdən çox olması, o cümlədən müxtəlif ölkələri təmsil etməsi “Caspian Agro”nun beynəlxalq nüfuzundan xəbər verir…

- “CaspianAgro 2015” sərgisi Azərbaycanda reallaşdırılmış və kənd təsərrüfatının dinamik inkişafına kömək edən aqrar islahatların nəticələrini göstərməklə yanaşı, ötən illə müqayisədə 20 faiz artım nümayiş etdirir. Bakı Ekspo Mərkəzinin iki pavilyonunu və xarici meydançasını əhatə edən “CaspianAgro 2015” sərgisi dünyanın 21 ölkəsini təmsil edən 142 şirkəti bir arada toplayır. Sərginin iştirakçıları arasında Almaniya, Yunanıstan, İtaliya, İspaniya, Koreya Respublikası, Niderland Krallığı, Rusiya, ABŞ, Türkiyə, Ukrayna, Fransa və digər ölkələrdən kənd təsərrüfatı məhsulları və avadanlıqlarının istehsalçıları və distribüterləri var. Sərgidə geniş açıq ekspozisiya olacaq. Gəncə Avtomobil Zavodu, “New Holland”, “Azertexnika”, “Klever”, “Rostselmash” kimi şirkətlər öz avadanlıqlarını təqdim edəcəklər.

- Builki sərgidə kənd təsərrüfatı istehsalçılarını daha hansı yeniliklər gözləyir?

- Hər il “CaspianAgro” sərgisini ziyarət edən fermerlərin sözlərinə görə, bu tədbir kənd təsərrüfatı sahəsi üzrə ən son yeniliklərlə tanış olmaq üçün ən yaxşı məkandır. “CaspianAgro” 2015 sərgisi kənd təsərrüfatı üçün yenilikləri təqdim edən Almaniya, Rusiya, Fransa, İtaliya, İspaniya, Ukrayna və Hollandiyadan olan şirkətləri bir araya gətirəcək. İlk dəfə olaraq sərgidə Şri-Lanka və İordaniya şirkətləri də iştirak edəcəklər. Sərgi bu il də ən müxtəlif istiqamətlər üzrə bir sıra yeni məhsullarla - kombaynlar, süni göllər yaratmaq üçün texnologiyalar, geo-membranlar və geo-tekstil, ən son suvarma və irriqasiya sistemləri, avtomatlaşdırılmış damla suvarma sistemi, separator (ayırıcı) sistemlər, şüşə və tunel istixanalar, bitkiçilik və gülçülük sahəsi üçün məhsullar, bio-arılar, meyvə-tərəvəz sahəsi üzrə yeni növlər və bir sıra digər məhsullarla tanışlıq üçün imkan yaradır.

- “CaspianAgro 2015”-dən gözləntiləriniz nədir və sizcə bu sərgi Azərbaycanın kənd təsərrüfatına hansı töhfə verə bilər?

- Sərgidə Avropanın, Asiyanın və MDB ölkələrinin aparıcı şirkətləri tərəfindən ən son texnologiyalar, avadanlıqlar və məhsullar nümayiş etdiriləcək ki, bu da ölkəmizin qida və kənd təsərrüfatı sahəsində fəaliyyət göstərən mütəxəssis və iş adamlarının böyük marağına səbəb olacaq. Biz inanırıq ki, sərgiyə gələn qonaqlar həm beynəlxalq təcrübə ilə tanış olmaq, həm də bunu öz istehsal və iş prosesində tətbiq etmək imkanı qazanacaqlar. Ənənəvi olaraq, “CaspianAgro” sərgisi çərçivəsində Kənd Təsərrüfatı Nazirliyi və “Aqrolizinq” ASC-nin təşkilati dəstəyi ilə Azərbaycanın 22 bölgəsinə sahibkar və fermerlər üçün işgüzar turlar təşkil olunub. Bu işgüzar turlar azərbaycanlı sahibkarları yüksək keyfiyyətli məhsulların istehsalı üçün başlıca amillər olan yeni texnologiyalarla tanış etmək və onlarla təcrübə mübadiləsi aparmaq məqsədi daşıyır.

Mən sərgidə iştirak edəcək hər kəsə uğurlu və məhsuldar iş, səmərəli əməkdaşlıq arzulayıram. İnanırıq ki, sərgidə təqdim olunan məhsulların müxtəlifliyi və aparıcı müəssisələrin təmsil olunması Azərbaycanla yanaşı, iştirak edən ölkələrin istehsalı olan məhsulların təşviqinə, onların gələcəkdə keyfiyyətinin və çeşidinin genişlənməsinə xidmət edəcək.

- Müsahibəyə görə çox sağ olun.