Cəbrayılın azad olunması Ordumuzun zabit və əsgərlərinin şücaətinin nəticəsidir – AÇIQLAMA
Vətən müharibəsinin ilk günlərindən şanlı Ordumuz çətin də olsa, cəbhəni məhz bu istiqamətdən yardı
Bakı, 4 oktyabr, AZƏRTAC
Birinci Qarabağ müharibəsi zamanı Cəbrayıl rayonundan 362 nəfər şəhid olub, 191 nəfər əlil olub, altı nəfər Azərbaycanın Milli Qəhrəman adına layiq görülüb. 1930-cu ildə yaradılan Cəbrayıl rayonu Kiçik Qafqaz dağlarının cənub şərqində, Araz çayının sol sahilində, cənub tərəfdən İran, cənub qərbdən Zəngilan, qərbdən Qubadlı, şimaldan Xocavənd, şərqdən isə Füzuli rayonları ilə həmsərhəddir.
Məlum olduğu kimi, 1994-cü il yanvarın 5-də Horadiz əməliyyatı zamanı Cəbrayıl rayonunun Cocuq Mərcanlı kəndi düşmən işğalından azad olunub. 2016-cı ildə Aprel döyüşləri zamanı isə Azərbaycan Ordusunun əks-hücum əməliyyatı nəticəsində Lələtəpə yüksəkliyi də düşməndən təmizləndi və nəticədə Cocuq Mərcanlı kəndi ordumuzun nəzarətinə keçib.
Ehtiyatda olan polkovnik, əslən Cəbrayıl rayonundan olan Ələsgər Ağayev AZƏRTAC-a açıqlamasında həmin günlər barədə danışıb.
O xatırladıb ki, sentyabrın 27-də səhər saat 06:00 radələrində Ermənistan silahlı qüvvələri cəbhəboyu zonada yerləşən Azərbaycan Ordusunun mövqelərini, yaşayış məntəqələrini, eləcə də Cəbrayıl rayonunun Cocuq Mərcanlı kəndi də daxil olmaqla ölkəmizin bir neçə yaşayış məntəqəsini iriçaplı silahlardan, minaatanlardan və artilleriya qurğularından intensiv atəşə tutub. Bunun nəticəsində mülki əhali arasında ölüm və yaralananlar olub. Lakin düşmənin atəşkəsi pozmasına cavab olaraq ona adekvat cavab verilib. Ermənistan silahlı qüvvələrinin mövqelərinə zərbələr endirilib və onun atəş nöqtələri dərhal susdurulub. Ordumuz tərəfindən Xudafərin yaşayış məntəqəsi ələ keçirildikdən sonra Cəbrayıl rayonunun bir şəhəri, 97 kəndi və 4 qəsəbəsi düşmən tapdağından azad edilib. Eyni zamanda Azərbaycan ilə İran arasındakı dövlət sərhədi Silahlı Qüvvələrimizin tam nəzarəti altına keçib.
Azərbaycan Ordusunun cəza tədbirləri nəticəsində Cəbrayıl şəhərindəki Ermənistan silahlı qüvvələrinin 18-ci motoatıcı diviziyasının artilleriya rəisi məhv edilib. Eləcə də həmin diviziyanın silah və texnikası qənimət kimi ələ keçirilib.
Onun sözlərinə görə, Cəbrayıl şəhəri və bir neçə yaşayış məntəqəsi nəzarətə götürüldükdən sonra hücum həm Arazboyu, həm də Hadrut qəsəbəsi istiqamətlərində dərinliyə və cinahlara inkişaf etdirilməyə başlayıb. Ertəsi gün Cəbrayıl rayonu istiqamətində Ordumuzun mövqelərinə aviazərbələr endirməyə cəhd göstərən Ermənistanın “SU-25” hücum təyyarələri Azərbaycanın Hava Hücumundan Müdafiə Qoşunlarının bölmələri tərəfindən məhv edilib. Müzəffər, Ali Baş Komandan Prezident İlham Əliyev öz tviter səhifəsində paylaşım edərək Silahlı Qüvvələrimizin qədim Xudafərin körpüsü üzərində Azərbaycanın üçrəngli bayrağını qaldırdığını elan edib.
Cəbrayılın azad olunması ilə Laçın dəhlizi Azərbaycan Ordusunun nəzarətinə götürüldü
Cəbrayıl rayonunun işğaldan azad olunması Azərbaycan Ordusunun möhtəşəm Qələbəsidir. Bu Zəfər hər bir zabit, gizir və əsgərimizin fədakarlığının və şücaətinin parlaq nəticəsidir. Vətən müharibəsinin ilk günlərindən şanlı Ordumuz çətin də olsa, cəbhəni məhz bu istiqamətdən yardı. Cəbrayılda qazanılmış uğurlar ordumuzun Xocavənd, strateji yöndən əhəmiyyətə malik olan Hadrut qəsəbəsi istiqamətində hərbi əməliyyatların aparılması üçün geniş imkan yaratdı. Cəbrayılın azad olunması ilə əvvəlcə Zəngilan, sonra Qubadlı və Laçın rayonlarının cənub hissələri düşmən tapdağından təmizləndi. Eyni zamanda, Laçın dəhlizi kimi strateji ərazi Azərbaycan Ordusu tərəfindən nəzarətə götürüldü.
2020-ci ildə Prezident İlham Əliyevin müvafiq Sərəncamına əsasən “Cəbrayılın azad olunmasına görə” medalı təsis edilib. Beləliklə, döyüşlərdə iştirak edən minlərlə hərbi qulluqçumuz Müzəffər Ali Baş Komandan tərəfindən həmin medallarla təltif olunub.
Cəbrayıl azad olunduqdan sonra ora gedib kəndlərindəki öz evlərini tapdığını, önündə səhra geyimində şəkil çəkdirdiyi üçün sevincli olduğunu vurğulayan ehtiyatda olan polkovnik deyib: “2020-ci ildə İkinci Qarabağ müharibəsi yeni başa çatdıqdan sonra Cəbrayıla getdim. Ümumiyyətlə Cəbrayılda bir dənə də olsun salamat ev qalmayıb. Doğma Dağ xələfli kəndimizə qayıdanda onu tanımadım, ermənilər orada daşı daş üstə qoymayıblar, evlərimizi dağıdıblar.
Vətən müharibəsi zamanı N saylı hərbi hissənin tərkibində döyüş bölgəsində olmuşam. Bu illər ərzində hər gecə yatarkən yuxumda kəndimizi görürdüm. Doğma el-obamıza gec-tez qayıdacağımıza inanırdım. Ölkəmizin iqtisadiyyatı inkişaf etdi, Ordumuzda islahatlar aparıldı, peşəkar zabit kadrları yetişdi. Gündən-günə güclənən Ordumuz, nəhayət 2020-ci ilin sentyabrında əks-hücum əməliyyatı keçirərək işğal altında olan ərazilərimizi düşməndən azad etdi. Odur ki, torpaqlarımız uğrunda canından keçmiş bütün şəhidlərimizə Allahdan rəhmət, qazilərimizə cansağlığı diləyirəm”.
Ələsgər Ağayev qeyd edib ki, qırx dörd günlük Vətən müharibəsində qazanılmış Zəfərdən sonra Prezident İlham Əliyevin daimi diqqəti və nəzarəti altında işğaldan azad olunmuş ərazilərdə müasir şəhərsalma siyasətinə əsaslanan geniş tikinti-quruculuq işləri aparılır. Cəbrayıl şəhəri də artıq yeni inkişaf mərhələsinə qədəm qoyub. Şəhərin Baş planı bu ilin iyulunda Nazirlər Kabinetinin müvafiq Qərarı ilə təsdiq edilib. Şəhərin bərpası və inkişafı üçün dörd mərhələ nəzərdə tutulur. 2026-cı ilin sonunadək təqribən 3800 nəfərin şəhərdə yerləşəcəyi proqnozlaşdırılır. Baş planda yaşayış üçün 143 hektar ərazi ayrılıb. Burada yaşayış binalarının, fərdi yaşayış evlərinin inşası nəzərdə tutulub. Ümidvaram ki, azad edilmiş digər rayonların sakinləri kimi, cəbrayıllı məcburi köçkünlərimiz də çox yaxın zamanda öz dədə-baba yurdlarına qayıdacaqlar”.
Bölmənin digər xəbərləri
